TOK OL MAN I MEKIM

Sampela man i ting Paradais i wanpela stori nating tasol. Na sampela i ting em i wanpela naispela gaden we ol gutpela manmeri bai stap oltaim na mekim ol gutpela wok na stap amamas.

TOK BAIBEL I MEKIM

Baibel i yusim dispela tok “paradais” bilong makim namba 1 ples bilong man, em gaden Iden. (Stat 2:7-15) Baibel i stori long dispela gaden olsem wanpela ples tru em namba 1 man na meri i bin stap na i no gat sik na i dai. (Stat 1:27, 28) Ol i sakim tok bilong God, olsem na tupela i no stap moa long Paradais. Tasol planti tok profet bilong Baibel i stori long taim bihain we ol manmeri bai stap long Paradais i kamap gen.

BILONG WANEM YU MAS TINGIM DISPELA?

Sapos God i gat pasin laikim, orait i stret em i praisim ol gutpela wokboi bilong em na givim gutpela sindaun long ol long Paradais. Na tu, i stret em i tokim ol manmeri long ol samting ol i mas mekim bambai em i ken orait long ol. Baibel i tok God i ken orait long yu, sapos yu kisim save long em na bihainim ol tok bilong em.— Jon 17:3; 1 Jon 5:3.

“Bikpela i wokim wanpela gaden i stap long Iden, . . . na long dispela gaden God i putim dispela man em i bin wokim.”—Stat 2:8.

TOK OL MAN I MEKIM

Sampela i ting Paradais i stap long heven, na sampela i tok Paradais bai kamap long graun long bihain.

TOK BAIBEL I MEKIM

Paradais bilong bipo i bin stap long graun. God i bin makim graun olsem ples we ol manmeri bai stap oltaim long en. Baibel i tok God i bin wokim graun bilong stap oltaim oltaim. (Song 104:5) Baibel i tok tu olsem: “Heven em i ples bilong God tasol, na em i givim graun long yumi manmeri.”—Song 115:16.

Olsem na yumi no kirap nogut long Baibel i tok promis olsem Paradais bai kamap long graun. Long Paradais, God bai givim laip oltaim long ol manmeri. Bel isi na pasin wanbel bai stap. Pen na hevi bai pinis. Na ol manmeri bai amamas long lukim ol naispela naispela samting God i bin wokim long dispela graun.—Aisaia 65:21-23.

“Haus sel bilong God i stap wantaim ol manmeri, . . . na bai i no gat dai moa, na ol bai i no bel hevi na krai moa, na ol bai i no inap pilim pen gen.”—Revelesen 21:3, 4.

TOK OL MAN I MEKIM

Planti lotu i tok ol gutpela manmeri tasol bai stap long Paradais. Tasol ol man i gat narapela narapela tingting long samting man i mas mekim bilong i stap olsem “gutpela man.” Sampela i ting pasin bilong insait long ol bung bilong lotu na kolim ol wankain beten, em inap.

TOK BAIBEL I MEKIM

Baibel i tok “ol stretpela man” bai stap long Paradais. Tasol husat i stretpela man long ai bilong God? I no ol man husat i insait long ol pasin bilong lotu na i no bihainim laik bilong God. Baibel i tok: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.” (1 Samuel 15:22) “Ol stretpela man” husat bai stap oltaim long Paradais, em ol man i bihainim tok bilong God long Baibel.

SAMTING YU KEN MEKIM

Pasin bilong insait long ol bung bilong lotu, dispela tasol i no makim olsem man i bihainim tok bilong God. Pasin yu mekim long olgeta de inap amamasim God o mekim em i bel hevi. Yu inap lain long amamasim God long rot bilong skelim gut Baibel. I no hatwok long amamasim God. Baibel i tok “ol lo bilong en i no givim hevi long yumi.” (1 Jon 5:3) God i amamas long praisim pasin bilong yu long bihainim tok na givim laip long yu long Paradais.

“Ol stretpela man bai i kisim graun God i givim ol, na bai ol i stap oltaim long en.”—Song 37:29.