OL BAKA—ol i kolim tu olsem ol Pigmi—ating ol i fes lain i bin sindaun long Kamarun. Bihain, long yia 1500 samting, ol Potugal i kam. Sampela handret yia bihain long dispela, lain Fulani, em lain Islam, ol i kisim noten Kamarun. Long nau, inap 40 pesen bilong ol manmeri long Kamarun i tok ol i Kristen, 20 pesen em ol Muslim, na narapela 40 pesen i bihainim ol lotu bilong Afrika.

Ol manmeri i stap long ol viles bilong Kamarun, ol i gat pasin bilong mekim gut long ol man. Ol i save tok gude na singautim ol visita i kam insait long haus na givim kaikai na wara long ol. Sapos visita i no kisim samting em papa bilong haus i givim, dispela em pasin nogut, na sapos visita i kisim, orait papa bilong haus bai amamas.

Pastaim visita i tok gude long famili na askim ol i stap orait o nogat. Em pasin bilong ol tu long askim sapos ol animal i stap orait! Joseph, wanpela man Kamarun, em i tok: “Taim visita i lusim haus, ol i no  inap tok ‘gutbai’ tasol long em. Planti taim papa bilong haus bai lusim haus na wokabaut wantaim visita i go long rot na toktok wantaim em. Bihain liklik, em bai tok gutbai long visita na go bek long haus. Sapos papa bilong haus i no mekim olsem, visita inap pilim olsem ol i no amamas long em.”

Long taim bilong kaikai, sampela taim ol pren i save kisim kaikai long seim plet—sampela taim ol i kaikai long han. Long Kamarun, dispela kastam em i strongpela mak bilong pasin wanbel. Sampela taim ol i mekim dispela pasin bilong bungim gen ol man em pasin pren bilong ol i no strong moa. Taim ol i kaikai wantaim, i olsem ol i tok, “Mipela i stap bel isi nau.”