Nius Haaretz.com i tok ol pikinini “i bon wantaim bagarap long bodi em ol dokta inap luksave long en long taim ol i sekim bebi long bel bilong mama,” ol yet i no inap kotim ol dokta long dispela samting. Tasol ol papamama inap kotim ol dokta long dispela na bai ol i ken kisim kompensesen long “ol i bin tromoi planti mani bilong mekim bikpela long pikinini i gat bagarap long bodi na long lukautim em long laip olgeta bilong em.”

Long Australia, long olgeta 10-pela 10-pela marit 8-pela i sindaun nating wantaim paslain long ol i marit.

Ol ripot bilong Dipatmen Bilong Helt long Grik i soim olsem namba bilong ol manmeri i suasaid long Grik long Janueri i go Me, 2011, i go antap inap 40 pesen winim bilong wankain haptaim long 2010. Dispela i bin kamap long wankain taim we kantri i bin gat bikpela hevi bilong mani.

Lain Natural Resources Defense Council i tok, ol man i save westim winim 40 pesen bilong ol kaikai long olgeta hap bilong graun. Olsem, ol i tok inap 7 pesen bilong kaikai em ol man i no save kisim taim em i redi long gaden, na 17 pesen bilong ol kuk kaikai long haus kai em ol man i no save kaikai, na ol famili i save tromoi nating 25 pesen bilong ol kaikai ol i baim.

I no longtaim i go pinis long Madagaska, ol man i bin painim wanpela kain palai em ol i liklik tru winim olgeta narapela palai long graun. Longpela bilong ol em inap 29 milimita, na sampela bilong ol dispela liklik braunpela palai inap sindaun antap long kapa bilong pinga bilong man. Ol man i wok long bagarapim hap ol i save stap long en, olsem na klostu ol dispela animal bai pinis olgeta.