Olsem wanem? Yu na poroman marit bilong yu i hatwok long toktok gut wantaim long ol samting? Yu save tingting planti, long wanem, yu no save sapos tok yu mekim o samting yu mekim inap mekim poroman marit bilong yu i bel hevi na kirapim kros?
Sapos olsem, orait yu ken bilip tru olsem yu inap winim dispela hevi. Tasol pastaim yu mas painimaut as na yu na poroman marit bilong yu i save tok pait oltaim.
AS NA DISPELA I KAMAP
Tingting kranki. Wanpela meri marit nem bilong em Jilliana i tok: “Sampela taim mi mekim sampela tok long man bilong mi, tasol em i no kisim tingting mi laik kamapim, o mi ting olsem mi bin tokim em long sampela samting, tasol tru tru mi no bin tokim em!”
I no gat wankain tingting.
Maski pasin bilong yu wantaim poroman marit i stret wantaim, tingting bilong yupela long sampela samting bai i no wankain. Bilong wanem? Bikos man na meri i no gat wankain tingting long olgeta samting, dispela inap mekim na marit i wok gut wantaim o inap kamapim hevi. Long planti marit, dispela i save kamapim hevi.
I no stap gutpela piksa.
Wanpela meri marit nem bilong em Rachel, i tok: “Papamama bilong mi i save tok pait planti taim na kolim ol tok i no soim rispek long narapela narapela, olsem na taim mi marit, mi save toktok long man bilong mi wankain olsem mama i save mekim long papa. Mi no lain long soim rispek.”
As tru bilong hevi.
Planti taim, narapela samting i as bilong bikpela tok pait na i no samting i bin kirapim dispela tok pait. Olsem, poroman i kirapim tok pait olsem, “Olgeta taim yu save leit!” i no makim olsem poroman i mas bihainim taim, nogat, as bilong en em narapela poroman i pilim olsem poroman marit bilong em i no tingim gut em.
Maski wanem samting i kirapim tok pait, pasin bilong tok pait oltaim inap nogutim helt bilong yupela na bihain yupela inap divos long dispela. Olsem wanem yu inap lusim pasin bilong tok pait?
SAMTING YU KEN MEKIM
Gutpela rot bilong pasim tok pait em long luksave long ol samting i save kirapim tok pait. Taim yutupela i stap bel isi, traim bihainim dispela tok i stap daunbilo wantaim poroman marit bilong yu.
1. Long narapela narapela pepa, yutupela wan wan i mas raitim samting i bin kirapim tok pait i no longtaim i go pinis. Olsem, man marit inap raitim kain tok olsem, “Yu raun de olgeta wantaim ol pren bilong yu na yu no ring na tokim mi long wanem hap yu stap.” Meri marit inap raitim kain tok olsem, “Yu kros bikos mi stap wantaim ol pren bilong mi.”
2. Long stretpela tingting, toktok long dispela ol askim: Samting yutupela i tok pait long en em i bikpela samting? Yu ting yutupela inap lusim tingting tasol long en? Sampela taim, bilong stap bel isi i gutpela yutupela i wanbel olsem yupela i gat narapela narapela tingting na larim pasin laikim i karamapim ol liklik popaia.—Stiatok bilong Baibel:Sindaun 17:9.
Sapos yu na poroman marit i ting olsem samting yupela i kros long en i no bikpela samting, orait tok sori long narapela narapela na no ken tingim moa.—Stiatok bilong Baibel:Kolosi 3:13, 14.
Sapos yutupela i ting em i bikpela samting, orait bihainim dispela narapela rot.
3. Raitim long pepa yu bin pilim olsem wanem taim yutupela i kros na tokim poroman marit bilong yu tu long mekim olsem. Olsem, man marit inap raitim tok olsem, “Mi pilim olsem yu laik stap tasol wantaim ol pren bilong yu na yu no laik stap wantaim mi.” Meri marit inap raitim tok olsem: “Mi pilim olsem yu mekim pasin long mi olsem mi wanpela pikinini meri husat i mas toksave long papa bilong em long em i stap we.”
4. Senisim pepa wantaim poroman marit na ritim tok em i raitim. Wanem astingting tru bilong poroman marit bilong yu taim yutupela i tok pait? Toktok wantaim long samting em sapos yutupela wan wan i bin mekim bai stretim hevi na bai yutupela i no tok pait.—Stiatok bilong Baibel:Sindaun 29:11.
5. Toktok wantaim long skul yupela i kisim long ol dispela samting i stap antap. Olsem wanem yu inap yusim dispela long stretim na pasim tok pait long kamap bihain?