“MOOSE i luk narapela kain na em i no luk nais tumas. Bilong wanem em i bikpela olsem? Bilong wanem het bilong em i longpela?” Em tok Henry David Thoreau i bin raitim inap 100 yia i go pinis, na ating ol narapela man tu i gat wankain tingting olsem long moose. Dispela animal i save stap wanpis long bikbus na i luk pani na wan wan man tasol i save lukim em, olsem na sampela i ting olsem moose i no save wokabaut gut na i no smatpela animal. Dispela tingting i tru o nogat? Ol saveman long Not Amerika na Yurop na Esia i bin kisim planti save long dispela narakain animal.

Olgeta man i wanbel long tok olsem moose em i bikpela animal. Maski dispela “king bilong bikbus” i gat longpela lek we i mekim em i luk olsem em i no save wokabaut gut, ol dispela lek inap rausim lain wulf. Moose i lain long swim insait long sampela de bihain long em i bon, na ol man i bin lukim moose i swim inap sampela kilomita na daiv i go insait long wara inap 6 mita bilong kaikai ol gras samting i save gro long wara!

Moose inap tanim ai bilong en na lukim samting i stap long baksait bilong en, na i no gat wok long tanim het bilong mekim olsem. Nus bilong en tu i wok gut tru. Ol saveman i tok 2-pela hul bilong nus bilong moose i stap longwe, na ating dispela i mekim na em inap painim gut ples we samting i stap long en. Yau bilong en tu i helpim em  long mekim olsem. Yau bilong en inap tanim long olgeta sait, na moose inap harim singaut bilong narapela moose i stap longwe inap 3 kilomita!

Wanpela man bilong raitim buk i tok ol pikinini moose i luk “nais na pani,” na ol i laik save long ol samting na ol i no wari. Mama bilong ol i save sambai long ol na lukautim ol gut. Mama moose bai pait long olgeta husat i laik kisim pikinini bilong em, olsem ol wulf, bea, na ol man tu. Taim pikinini moose i gat 1-pela krismas na mama bilong en i gat bel gen, mama i strong long rausim yangpela moose i go longwe bambai em i ken kirap lukautim em yet.

Ol moose i save kaikai ol lip na gras tasol, olsem na olsem wanem ol inap stap gut long taim bilong kol? Wanpela samting, em ol i save kaikai planti tru long taim bilong san. Moose i save kaikai inap 23 kilogram lip na gras long olgeta de, em ol samting i gro longpela inap 3-pela mita antap long graun o aninit long wara. Kaikai i go long bel i gat 4-pela hap, we bel i mekim gutpela wok long dispela kaikai na kisim ol gutpela marasin na gris bilong en. Tasol i gat ol narapela hevi i save painim moose long taim bilong kol.

Ples i kol tru na graun i gat bikpela ais na dispela i save givim hevi long moose. Long taim bilong kol, em i stap isi na em i no save wokabaut planti, long dispela rot em i no lusim planti hat bilong bodi. Moose i hatwok long ranawe long ol wulf taim bikpela ais i stap long graun, tasol planti taim moa ol man i bagarapim ol moose taim ol i kilim ol bilong kisim abus o bamim ol long kar.

Moose i laikim tru ol gutpela marasin i save stap long sol ol i tromoi long planti haiwe bilong hap not bilong mekim ais i melt. Tasol gras bilong moose i blakpela na ol i save brukim rot taim san i go daun pinis, olsem na ol draiva i hatwok long lukim na abrusim ol. Taim kar i bamim moose, ol moose na ol draiva wantaim i save dai.

Ol man i bin lukim ol moose i pilai long ol weiv bilong solwara na waswas long ol hatwara i kamap long graun. Long taim bilong kamapim pikinini, man na meri moose i soim pasin isi long narapela narapela, na mama moose i save stap gut long pikinini bilong em. Ol pikinini moose em ol man i kisim na lukautim, ol i save pas gut wantaim ol man i lukautim ol. Dokta Valerius Geist i tok: “Dispela narakain animal i no gat naispela pes tumas, tasol em i smat, na em i tingim tru na stap gut long pikinini bilong em.”

Wanpela tok lukaut: Moose i gat bikpela strong tru. Sapos yu lukim wanpela moose, stap isi na stap longwe long en. Dispela i bikpela samting moa taim ol pikinini moose i stap klostu. Tasol maski yu stap longwe, bai yu amamas long lukim dispela narakain bikpela animal bilong bikbus.