Tineja pikinini bilong yu i tok yu save putim strongpela lo tumas. Yu no ting lo yu putim i strong tumas, bikos yu laik banisim pikinini long ol hevi. Yu tingting, ‘sapos mi no putim strongpela lo, ol hevi bai painim em!’

Yu inap putim ol lo i stret long tineja bilong yu. Tasol pastaim yu mas kliagut long as na em i les long bihainim ol lo.

Tingting giaman: Olgeta tineja i save bikhet long ol lo, em pasin bilong ol.

Tok tru: Tineja bai no bikhet tumas taim papamama i putim ol lo i stret long mak na i toktok gut wantaim em long ol dispela lo.

Planti samting inap mekim na pikinini i bikhet, tasol ating papamama yet i kirapim pikinini long bikhet sapos ol i putim ol lo i strong tumas o i no stret long krismas bilong pikinini. Tingim ol dispela samting:

• Strongpela lo. Taim papamama i putim lo na ol i no redi long toktok long dispela lo, tineja bai pilim olsem papamama bilong em i putim ol lo bilong kontrolim em na i no bilong lukautim em. Dispela inap mekim na long pasin hait tineja i mekim ol samting em papamama i tambuim em long mekim.

• I no stret moa long krismas bilong tineja. Ating taim pikinini i liklik yet, em i save bihainim tasol olgeta tok bilong papamama, tasol tineja i laik save long as na papamama i putim lo. Tingim, ating liklik taim bihain bai tineja i lusim haus na i go stap bilong em yet na wokim ol bikpela disisen. I gutpela moa long em i lain long wokim tingting na mekim ol gutpela disisen nau taim em i stap yet aninit long lukaut bilong yu.

Tasol yu inap mekim wanem sapos i luk olsem oltaim ol lo yu putim i save sikirapim bel bilong pikinini?

Pastaim yu mas save olsem ol tineja i nidim na i laikim ol lo bilong stiaim ol. Olsem na putim ol lo, na stori gut long ol dispela lo na bai tineja i kliagut long en. Buk Letting Go With Love and Confidence i tok: “Taim papamama i putim ol lo long tineja na bosim em inap tasol long mak, ating tineja bai no insait tumas long ol pasin nogut.” Tasol papamama husat i no putim ol lo long tineja, i olsem ol i no tingim na wari long em. Na dispela bai kirapim pikinini long bikhet.—Stiatok bilong Baibel: Sindaun 29:15.

Orait, olsem wanem yu inap balensim ol samting? Larim tineja i kamapim tingting em i gat long ol lo bilong famili. Olsem, sapos em i laik bai yu senisim taim yu bin makim long em i mas kam bek long haus, orait putim gut yau taim em i kamapim tingting bilong em. Taim tineja i save olsem papamama i putim gut yau long tingting bilong em, ating em bai rispektim na bihainim disisen yu mekim—maski em i no wanbel long en.—Stiatok bilong Baibel: Jems 1:19.

Tasol paslain long yu wokim disisen, tingim dispela: Ol tineja i laik kisim fridom long planti samting, winim mak bilong ol, tasol ating papamama i laik givim liklik fridom tasol long ol, aninit long mak ol i ken givim. Olsem na tingim gut samting tineja i askim yu long en. Olsem wanem? Em i soim olsem em i save tingting gut na mekim samting? Yu inap givim sampela moa fridom long em? Redi long senisim lo taim i stret long mekim olsem.—Stiatok bilong Baibel: Stat 19:17-22.

Putim gut yau long tingting bilong tineja, na tu, kamapim ol wari bilong yu long tineja. Taim yu mekim olsem, yu lainim em long tingim laik bilong ol narapela tu, na i no bilong em yet tasol.—Stiatok bilong Baibel: 1 Korin 10:24.

Laspela samting, wokim disisen na stori gut long as na yu wokim dispela disisen. Maski tineja i no amamas long disisen, ating em i amamas long em i gat papamama husat i save putim yau long tingting bilong em. Tingim, yu wok long lainim tineja long rot bilong stap olsem man i bikpela pinis. Taim yu putim ol lo na toktok gut wantaim tineja long ol dispela lo, yu helpim em long kamap man i gat gutpela tingting.—Stiatok bilong Baibel: Sindaun 22:6.