SPAIDA bilong kalap i gat narakain ai na dispela ai bilong em i helpim em long mesarim stret hamas sentimita em i mas kalap. Spaida i mekim olsem wanem?

Tingim: Bilong mesarim longwe bilong wanpela samting, spaida bilong kalap i yusim wanpela samting i stap long 2-pela bikpela ai bilong en, em retina i gat 4-pela sel o hap bilong lukim lait. Taim wanpela hap i kisim gut grinpela lait, narapela hap i no lukim klia dispela samting. Taim dispela hap bilong retina i no lukim gut samting, ai bilong spaida i lukim olsem dispela samting i stap klostu. Dispela samting i helpim spaida long mesarim hamas sentimita stret em i mas kalap bilong kisim binatang.

Ol saveman i laik bihainim dispela pasin bilong spaida bilong kalap na wokim ol 3-D kamera na ol robot we inap mesarim longwe bilong wanpela samting. Wanpela niuslain long Intenet em ScienceNOW i tok, ai bilong spaida bilong kalap i “wanpela eksampel long olsem wanem ol 0.5 sentimita animal em kru bilong ol i liklik moa long kru bilong lang, ol inap lukim gut samting na mekim wok long dispela save ol i kisim.”

Yu ting wanem? Ai bilong spaida bilong kalap we i no inap lukluk gut i kamap nating? O wanpela man i bin wokim?