“Yu no ken poroman wantaim ol man i save dring planti wain na kaikai planti.”—Sindaun 23:20.

BILONG WANEM EM I BIKPELA SAMTING?

Baibel i no wanpela buk bilong helt na em i no bosim olgeta samting man i mekim long i stap bilong em. Tasol ol tok bilong en inap helpim yu long kliagut long tingting bilong God long helt.

TOK BAIBEL I MEKIM

Planti tok bilong Baibel i kamapim klia tingting bilong God long ol samting yumi mekim long bodi bilong yumi. Olsem, Baibel i tambuim ol pasin inap bagarapim man, na pasin bilong dring spak na kaikai planti tu i insait long en. (Sindaun 23:20) Long Lo God i givim long lain Israel bilong bipo i gat sampela lo i lukautim ol na banisim ol long kain kain sik. Na tu, Lo i kolim stret samting ol i mas mekim bilong abrusim ol bagarap inap kamap. (Lo 22:8) Olsem na Baibel i tokaut stret long lukautim bodi bilong yumi na mekim ol samting bilong lukautim helt bilong yumi.

“Long rot bilong wanpela man tasol sin i kamap long graun. Na sin i bringim dai i kam.”—Rom 5:12.

 TOK OL MAN I MEKIM

Planti man i ting olsem sik em wanpela hap bilong ol senis i kamap long man. Ol narapela i ting olsem sampela kain strong, olsem ol spirit nogut, i as bilong ol sik i painim yumi.

TOK BAIBEL I MEKIM

Baibel i tok yumi kisim sik, long wanem, namba 1 man na meri i bin bikhet long God. (Rom 5:12) Paslain long namba 1 papamama bilong yumi em Adam na Iv i bikhet, ol i bin stap gutpela olgeta na i no gat sik. Ol i save olsem ol bai dai sapos ol i sakim gutpela lukaut bilong God. (Stat 2:16, 17) Tasol long laik bilong ol yet ol i sakim pasin pren bilong ol wantaim God na nau ol i no stap gutpela olgeta. a

Bihain long Adam na Iv i lusim laip i gutpela olgeta, yumi tu i kisim sin long tupela. Olsem na maski ol manmeri i traim olgeta samting bilong pinisim ol sik, yumi save kisim sik yet.

YU INAP MEKIM WANEM?

Baibel i tok sapos yu kamap wanbel wantaim God long rot bilong bihainim ol stiatok bilong em, orait bai yu gat gutpela helt long Paradais long graun. (Aisaia 33:24) God i tok promis long pinisim pen, sik, na dai.—Revelesen 21:3, 4.

“Ol man i no gat sik ol i no save go lukim dokta, tasol ol sikman ol i save go lukim dokta.”—Matyu 9:12.

TOK OL MAN I MEKIM Sampela man i strong long pasin bilong oraitim ol sikman long rot bilong mirakel na ol i no laik kisim marasin samting.

TOK BAIBEL I MEKIM

God i bin larim ol man i mekim wok dokta namel long ol manmeri bilong em long taim bilong ol man i bin raitim Baibel. (Stat 38:28; Kolosi 4:14) I no gat wanpela tok i stap long Baibel i soim olsem God i no amamas long ol i yusim ol lip samting, oil na sanda, sampela kaikai ol i makim bilong sikman, na ol narapela samting bilong oraitim sik. Jisas i tok olsem “ol man i no gat sik ol i no save go lukim dokta, tasol ol sikman ol i save go lukim dokta.”—Matyu 9:12.

Tasol Baibel i no orait long olgeta kain pasin bilong oraitim sik. Olsem, Baibel i no orait long pasin bilong ol man long nau long oraitim ol sikman long rot bilong mirakel. Na God i no orait liklik long ol man i mekim wok bilong ol spirit nogut bilong oraitim sik. (Galesia 5:19-21) Yumi ken abrusim ol pasin em Baibel i tambuim na stretpela samting yumi ken mekim long taim yumi kisim sik em long go long haus sik.