ATING bai yu kirap nogut long save olsem dispela tupela marit long stori 1 em tupela seim marit long stori 2.

Olsem planti man bilong kros pait insait long famili i save mekim, Frank i giaman long ai bilong ol narapela o long ai bilong ol tambu papamama olsem em i gat gutpela pasin tru. Tasol taim em i stap wanpis wantaim meri bilong em, em i man nogut tru.

Planti man olsem Frank i kamap bikpela insait long famili i save kros pait, na taim ol i kamap bikpela ol i ting olsem pasin ol i mekim em i orait tasol na em i nomol pasin. Tasol pasin bilong paitim meri em i no wanpela nomol pasin. Olsem na planti man i no amamas taim man i paitim meri bilong em.

Tasol pasin bilong paitim meri em wanpela pasin i save kamap planti taim. Olsem, long  Amerika wanpela wok painimaut i soim olsem insait long wanpela de ol lain bilong helpim ol manmeri i gat kros pait insait long famili, ol i kisim averes olsem 16 fon kol insait long wanpela minit. Pasin bilong kros pait insait long famili em wanpela hevi i stap long olgeta hap bilong graun, maski ol man i gat wanem kalsa, ol i gat mani o nogat, o ol i bilong wanem lain. Planti i no ripotim ol kain hevi olsem, olsem na i luk olsem dispela hevi i bikpela moa winim ripot em wok painimaut i kamapim. b

Ol ripot bilong kros pait insait long famili i mekim na planti i tingting: Olsem wanem wanpela man inap mekim nogut tru long narapela, na moa yet long meri bilong em? Yu ting ol man husat i save paitim meri bilong ol inap kisim helpim long senisim dispela pasin bilong ol?

Ol Witnes Bilong Jehova em lain i wokim dispela nius, ol i bilip olsem ol gutpela tok bilong Baibel inap helpim ol poroman marit husat i save kros pait long senisim pasin bilong ol. Olsem wanem? Em i isi long senisim pasin bilong wanpela man? Nogat. Tasol yu ting man inap senisim pasin bilong em? Yes, em inap senis. Skul i kam long Baibel i bin helpim planti man long senisim pasin bilong ol long kros pait na kisim ol gutpela pasin na pasin rispek. (Kolosi 3:8-10) Lukim ekspiriens bilong Troy na Valerie.

Olsem wanem? Pastaim yutupela i save pas gut wantaim?

Valerie: Long nait mitupela i pasim tok long marit, Troy i solapim pes bilong mi na mi bin gat mak long pes inap wanpela wik. Em i tok sori planti taim na i tok promis olsem em bai i no inap mekim gen. Em i bin mekim dispela wankain tok planti taim insait long ol yia mipela i bin stap olsem marit.

 Troy: Kain kain samting i save mekim mi belhat, olsem taim meri bilong mi i redim kaikai leit. Wanpela taim mi bin paitim Valerie wantaim as bilong gan. Long narapela taim mi bin paitim em nogut tru na mi ting olsem mi bin kilim em i dai. Bihain mi putim naip long nek bilong pikinini man bilong mipela na tok bai mi kilim em i dai, mi mekim olsem bilong pretim Valerie.

Valerie: Oltaim mi save pret. Sampela taim mi mas ranawe lusim haus inap long Troy i stap bel isi gen. Maski em i save paitim mi nogut tru, ol tok em i mekim bilong bagarapim mi i save daunim mi tru winim pasin bilong em long paitim mi.

Troy, yu bin gat dispela pasin bilong kros pait bipo yet?

Troy: Yes, kirap long taim mi liklik yet. Mi kamap bikpela insait long famili i gat pasin bilong pait. Planti taim papa i save paitim mama bilong mi long ai bilong mi na ol narapela bratasusa bilong mi. Bihain long em i lusim mipela, mama bilong mi i stap wantaim narapela man, na em tu i save paitim mama. Em i reipim susa bilong mi na mi. Em i bin go long kalabus long dispela pasin bilong em. Tasol mi luksave olsem dispela i no ken stap olsem eskius long ol pasin mi mekim.

Valerie, wai na yu stap yet long dispela marit?

Valerie: Mi bin pret. Mi tingting long mi yet olsem, ‘Nogut em bai painim mi na kilim mi o kilim papamama bilong mi i dai. O sapos mi ripotim em long polis ol samting bai go nogut moa.’

Wanem taim ol samting i stat long senis?

Troy: Meri bilong mi i kirap long stadi long Baibel wantaim ol Witnes Bilong Jehova. Pastaim, mi jeles long ol nupela pren bilong em na mi tingting olsem mi mas helpim em long lusim dispela narakain lain. Olsem na pasin bilong mi long kros pait i go nogut moa, i no long Valerie tasol, long ol Witnes tu. Tasol wanpela taim pikinini man bilong mipela Daniel i gat 4-pela krismas, i kisim wanpela kain sik olsem epilepsi na em i mas slip long haus sik inap 3-pela wik. Long dispela taim ol Witnes i helpim tru mipela—ol i helpim tu long was long pikinini meri bilong mipela Desiree i gat 6-pela krismas. Bihain long Valerie i lukautim Daniel long nait olgeta, wanpela Witnes i stap de olgeta bilong lukautim Daniel na bai Valerie i ken slip. Mi pilim tru pasin helpim bilong ol dispela manmeri—em ol manmeri mi save mekim nogut long ol. Nau mi luksave olsem ol dispela  lain i mekim pasin bilong ol Kristen tru, olsem na mi askim ol Witnes olsem mi laik stadi long Baibel wantaim ol. Taim mi stadi long Baibel, mi kisim save long pasin man i mas mekim long meri bilong em na ol pasin em i no ken mekim. Mi lusim olgeta pasin bilong mi long kros pait na tok nogut. Bihain mi kamap wanpela Witnes Bilong Jehova.

Wanem ol stiatok bilong Baibel i helpim yu long senis?

Troy: I gat planti stiatok. Long 1 Pita 3:7, Baibel i tok olsem mi mas givim “ona” long meri bilong mi. Galesia 5:23 i tok long mekim “pasin isi” na “bosim bel.” Efesus 4:31 i tambuim pasin bilong “tok nogut.” Hibru 4:13 i tok olsem ‘olgeta samting i stap ples klia long ai’ bilong God. Olsem na God i lukim pasin bilong mi maski ol neiba i no lukim. Mi kisim save tu olsem mi mas lusim ol olpela pren bilong mi, long wanem, “ol poroman nogut i save bagarapim ol gutpela pasin bilong man.” (1 Korin 15:33) Ol pren bilong mi long bipo i save kirapim mi long belhat na kros pait. Ol i ting olsem i stret long man i paitim meri na bai em i stap aninit long kontrol bilong man.

Yu pilim olsem wanem long marit bilong yu long nau?

Valerie: Inap 25 yia nau Troy i stap olsem wanpela Witnes Bilong Jehova. Insait long dispela haptaim em bin laikim mi, mekim gut long mi, na tingim mi tru.

Troy: Mi no inap senisim ol samting nogut mi bin kamapim long famili bilong mi na i no stret long mi bin mekim pasin nogut long meri bilong mi. Tasol mi wet long lukim truim bilong Aisaia 65:17, taim yumi no inap tingim moa ol samting i bin kamap bipo.

Wanem gutpela tok yutupela wan wan inap givim long ol famili i gat pasin bilong kros pait?

Troy: Sapos yu save pait o tok nogut long famili bilong yu, tokaut stret olsem yu nidim helpim na kisim helpim. I gat planti rot bilong kisim helpim. Mi bin stadi long Baibel wantaim ol Witnes Bilong Jehova na bung wantaim ol, na dispela i helpim mi long daunim pasin bilong mi long belhat na kros pait.

Valerie: No ken hariap long skelim sindaun bilong yu wantaim ol narapela o bihainim tok bilong ol manmeri em ol i ting ol i gat save long helpim yu. Samting i kamap long mipela bai i no inap kamap long olgeta marit, tasol mi amamas olsem mi no bin lusim man bilong mi, long wanem, nau mipela i pas gut tru wantaim.

Baibel i tok: “God em i as bilong olgeta tok i stap long Rait Holi, na ol i gutpela long skulim man, stretim man, mekim ol samting i kamap stret.” (2 Timoti 3:16) Olsem Troy em mipela i kamapim pinis stori bilong em, planti man marit husat i save mekim nogut tru long poroman bilong ol, ol i bin bihainim tok bilong Baibel na ol i senisim tingting na pasin bilong ol.

Olsem wanem? Yu laik kisim save moa long olsem wanem Baibel inap helpim marit bilong yu? Bilong kisim sampela save moa, yu ken askim ol Witnes Bilong Jehova long hap bilong yu o visitim Web-sait www.pr418.com/tpi.