Long wik i kirap long Oktoba 29, 2012, long New York City, pasin bilong kilim i dai man, mekim nogut tru long man, na mekim pasin raskol, i go daun tru insait long dispela 5-pela de taim ol i skelim wantaim wankain haptaim long yia 2011. Bilong wanem? Long wanem, saiklon Sandy i bin bagarapim tru Is Kos bilong Amerika, na i katim ron bilong pawa saplai. Paul Browne em mausman bilong New York Police Department i tok: “Bihain long kain bikpela disasta olsem o bikpela bagarap olsem [bagarap em teroris i kamapim long Septemba 11, 2001], ripot bilong pasin nogut na pasin raskol i go daun.” Tasol pasin bilong stilim samting i go antap, na Browne i no kirap nogut long dispela. Em i tok: “Planti hap i no gat lait.”

Ol saientis i wari olsem ol gras samting bilong ol narapela hap i wok long kamap planti long Antaktika na klostu nau bai i pinisim ol gras samting bilong Antaktika yet. Planti tausen visita husat i go long dispela kontinen long olgeta yia, ol i no save olsem ol i save karim averes olsem 9.5 sid i pas long ol su o bek bilong ol. Ol i bin painim planti narapela gras samting long hap bilong Westen Antaktik Peninsula.

Wanpela lapun meri i gat 83 krismas, em i namba 1 meri we ol dokta i wokim ain wasket bilong em long wanpela kain masin (3-D laser printer). Lapun meri i gat wanpela kain sik bilong bun we i bagarapim wasket bun bilong em, tasol nau em inap yusim dispela ain wasket long kaikai, pulim win, na toktok. Dispela masin i kukim ain taitenium na kamapim bun bilong wasket, bihain ol i mekim operesen long lapun meri na putim ain wasket long em.

Insait long wanpela yia em ol i tambuim pasin bilong smok long ol pablik eria long Jemani, long haus sik ol i skelim wanpela grup bilong ol sikman na ol i luksave olsem namba bilong ol man i gat wanpela kain sik bilong klok i go daun inap 13.3 pesen, na namba bilong ol man i gat sik hat atek i go daun inap 8.6 pesen.