BAIBEL I TOK WANEM?

God i gat wanem kain bodi?

PLEI

“God em i wanpela Spirit.”—Jon 4:24.

TOK BAIBEL I MEKIM

Baibel i tok God em i wanpela spirit. (2 Korin 3:17) Olsem na em i antap na winim tru yumi, na i hatwok long tingting bilong yumi ol man long skelim em i wanem kain. Namba 1 Timoti 1:17 i tok, em i “King bilong oltaim oltaim, em man i no inap bagarap na ol man i no inap lukim em long ai.” Na Baibel i tok tu olsem: “I no gat wanpela taim we wanpela man i bin lukim God.”—1 Jon 4:12.

Man Bilong Wokim yumi em i antap tru long yumi, olsem na i hatwok long yumi piksaim long tingting em i luk olsem wanem. Aisaia 40:18 i tok: “God i olsem husat tru? Na i gat wanpela samting i stap i luk olsem God, a?” Na tu, gutpela ples antap na ol sta samting long en em yumi save kirap nogut long en, ol i olsem samting nating taim yumi skelim wantaim God i Gat Olgeta Strong.—Aisaia 40:22, 26.

Tasol i gat sampela lain em ol i lukim God, sanap long ai bilong em na toktok wantaim em. Olsem wanem ol inap mekim olsem? Ol tu i spirit na ol i stap long heven. (1 King 22:21; Hibru 1:7) Jisas Krais i tok long dispela lain i gat bikpela strong, em ol ensel, olsem: “Oltaim ol . . . i save stap long ai bilong Papa bilong mi husat i stap long heven.”—Matyu 18:10.

Yu ting God i stap long olgeta hap long wankain taim?

“Yupela i mas beten olsem: ‘Papa bilong mipela long heven.’”—Matyu 6:9.

TOK BAIBEL I MEKIM

Baibel i no tok God i stap long olgeta hap long wankain taim, olsem wanpela kain strong tasol, nogat. Long Matyu 6:9 na Matyu 18:10, Jisas i soim yumi olsem God em i wanpela man—wanpela “Papa”—na em i save stap long heven, em “ples bilong [em].”—1 King 8:43.

Klostu long taim Jisas i dai, em i tok: “Nau mi bai lusim ol manmeri na go long Papa.” (Jon 16:28) Taim Krais i dai na i kirap bek olsem wanpela spirit, em i go antap na “i go insait long heven stret, bai em i ken i go sanap long ai bilong God.”—Hibru 9:24.

Ol dispela tok i tru long God em i wanem kain, dispela i bikpela samting. Bilong wanem? Wanpela as em olsem, God em i wanpela man, na yumi inap kisim save long em na go klostu long em. (Jems 4:8) Narapela as, tok i tru long God em i wanem kain i banisim yumi long ol lotu giaman, olsem lotuim ol imis i no gat laip na ol narapela samting. Namba 1 Jon 5:21 i tok: “Ol pikinini, yupela i mas i stap longwe long ol imis.”

Olsem wanem God i bin wokim ol man i kain olsem em yet?

“God i wokim ol manmeri na ol i kamap olsem God yet. God i mekim ol i kamap man na meri.”—Stat 1:27.

TOK BAIBEL I MEKIM

Yumi ol man inap kamapim ol pasin bilong God, olsem pasin laikim, stretpela pasin, na savetingting. Baibel i tok: “Yupela i mas bihainim pasin bilong God, em i laikim yupela tumas na yupela i stap olsem ol pikinini bilong em. Na yupela i mas wokabaut yet long pasin laikim.”—Efesus 5:1, 2.

Na tu, God i bin wokim yumi na yumi stap fri, olsem na yumi inap makim pasin i stret long mekim na sakim pasin i no stret, na yumi inap soim pasin laikim long ol narapela long kain kain rot. (1 Korin 13:4-7) Na yumi inap mekim kain kain wok, na amamas long lukim ol gutpela naispela bilas bilong graun. Na moa yet, Man Bilong Wokim yumi em i inapim laik bilong yumi long kisim save long em na long samting em i laik mekim.—Matyu 5:3.

Rot em Baibel inap helpim yu. Sapos yumi wok long kisim save long God na bihainim pasin bilong em, i stap bilong yumi bai wankain olsem em i laikim. Olsem na yumi inap amamas long i stap bilong yumi, ol wok samting yumi mekim, na bel bilong yumi bai stap isi. (Aisaia 48:17, 18) God i save olsem ol gutpela pasin bilong em inap kirapim tru bel bilong ol man, na dispela bai pulim ol man i gat gutpela bel i kam long em na stiaim ol i go long rot bilong kisim laip i stap oltaim.—Jon 6:44; 17:3.

Ating Yu Bai Laikim Tu

BEKIM BILONG OL ASKIM BILONG BAIBEL

Yu Ting God i Stap Long Olgeta Hap?

Yu ting Baibel i skulim ol man olsem God i stap long olgeta hap? Wai na yu ken bilip olsem em i stap long wanpela ples stret, na tu, em i save long yu?

KIRAP!