Wanpela ripot long Swiselan i stori long i dai bilong ol manmeri i winim 60 krismas. Ol i tok sans bilong ol long i dai long betde bilong ol em 14 pesen moa, winim ol arapela de. Long betde bilong ol manmeri, ol i save kisim sik hat atek 18 pesen moa winim ol arapela de, ol meri i save kisim sik strok 21 pesen moa winim ol arapela de, na ol man i save suasaid 35 pesen moa winim ol arapela de. Tasol sampela saveman i no wanbel long dispela ripot na ol i ting ol man i popaia na makim olsem de man i bon i wankain long de em i dai.

Planti taim ol kampani i save singautim ol man i luk nais long i go intaviu long wok taim ol dispela man i putim poto long aplikesen bilong ol, na kampani i no singautim ol meri i luk nais long mekim olsem. Bilong wanem? Ol saveman bilong Israel i tok as na dispela samting i kamap em bikos i gat planti meri i wok long dipatmen bilong kisim ol nupela wokman em ol i save wokim disisen long husat ol i laik intaviuim. Nius The Economist i tok, “pasin bilong ol meri long jeles i mekim na ol i heitim nating ol meri i luk nais.”

Tripela manmeri i save heitim woa em wanpela sister i gat 82 krismas na tupela poroman bilong em, wanpela i gat 63 krismas na narapela i gat 57 krismas, ol i brukim sekiuriti lo na go insait long wanpela banis long Oak Ridge, Tennessee, em hap we gavman i putim wan handret tan ol samting bilong bom nuklia. Na ol tripela i raitim ol tok long wanpela bilding olsem ol i heitim woa. Sekiuriti i no strong tumas long “dispela banis we i mas i gat strongpela sekiuriti tru,” na Steven Chu em Seketeri Bilong Energy i tok dispela em wanpela bikpela hevi.”

Nambawan bikpela kot bilong Australia i tokim ol kampani bilong wokim smok tabak long ol i mas rausim ol kala na ol tok na bilas samting antap long paket bilong smok. Nau kala bilong olgeta paket bilong smok i mas braun tasol na i mas i gat ol piksa i soim ol samting nogut i save kamap long pasin bilong smok.