ASEBAIJAN em stap long hap saut bilong Kokesas na em i bikpela bilong ol 3-pela kantri i stap long dispela hap. Klostu 1000 yia i go pinis bikpela lain Teki i kam sindaun long dispela hap. Ol dispela manmeri i wok long lain na kisim pasin bilong ol asples na ol asples tu i kisim sampela pasin bilong ol. Olsem na yumi no kirap nogut olsem tokples bilong ol Asebaijan i wankain liklik olsem tokples bilong ol Teki na tokples bilong ol Turkmen.

Lain Azeri ol i lain bilong amamas na ol i gat gutpela pasin pren. Ol famili i save pas gut wantaim na ol wanblut i save helpim narapela narapela long taim bilong hevi.

Ol lain Azeri i save laikim tru musik na poem. Long wanpela musik bilong ol em mugam, man bilong singsing i save kolim tok bilong ol poem bilong lain Azeri na ol narapela i pilaim musik. Man bilong mekim singsing i mas save gut tru long ol poem bilong mugam bilong bipo na em i mas save tu long mekim senis long ol tok bilong poem.

 Ti em i bikpela samting long kalsa bilong lain Asebaijan. Ol i wokim ti insait long ol liklik glas kap na ol i putim suga kain olsem sais bilong wanpela liklik dais na ol i givim ol liklik prut i no mau, pikinini bilong diwai almon, na pikinini bilong greip em ol i draim pinis long dring wantaim ti. Ol haus bilong dring ti i stap long olgeta hap na long ol liklik taun tu.

Solwara Caspian i stap long hap is bilong kantri, em i ples tru bilong pis beluga sturgeon. Pis sturgeon inap stap laip winim 100 yia. Wanpela traipela bilong dispela pis em ol i bin kisim i longpela inap 8.5 mita na hevi inap 1,297 kilogram! Ol man i save laik tru long kaikai kiau bilong pis sturgeon, ol i blakpela na i gat bikpela pe tru.

Lain Azeri i save tingim tru lotu na ol i save amamas long toktok na stori long God. Klostu olgeta bilong ol i bilong lotu Muslim. I gat ol narapela lotu i stap, na tu, i gat winim wan tausen ol Witnes Bilong Jehova, planti bilong ol em ol asples Asebaijan.