Wanem samting i kirapim yu long laikim saiens?

Taim mi liklik, mi save amamas long lukim ol samting i gat laip. Mi kamap bikpela long Richterswil, wanpela naispela viles bilong Swiselan i stap long nambis bilong raunwara Zurich. Papamama na ol bikpela bratasusa bilong mi i save kisim mi i go wokabaut na stori long ol animal na ol plaua samting mipela i lukim long rot.

Wai na yu stadi long kamap speselis dokta bilong bun?

Inap sotpela haptaim, papa bilong mi i wok olsem helpim bilong ol nes long rum bilong katim man long haus sik long hap mipela i stap long en. Samting em i lukim i kirapim em long stori long ol gutpela samting long wok bilong katim man. Dispela stori bilong em i kirapim laik bilong mi long skul na kisim wok olsem dokta bilong katim man i gat sik o bagarap long bun. Mi kamap speselis dokta bilong bun bikos mi laikim hau ol bun na join samting i save wok. Ol dokta bilong bun i mas tingting olsem ol ensinia bambai ol i ken stretim ol bun na ol masol samting i save helpim yumi long wokabaut o muvim bodi.

Bikpela samting moa em olsem mi save amamas long lukim ol sikman mi helpim ol i kamap orait. Mi save amamas tu long wok gut wantaim ol manmeri.

Wai na yu no bilip olsem i gat God i stap?

Taim mi yangpela, i gat tupela samting i as na mi no bilip olsem God i stap. Namba 1, mi luksave olsem i gat sampela tisa bilong lotu i save mekim pasin pamuk, na dispela i bagarapim tru bel bilong mi. Namba 2, sampela baioloji tisa bilong mi long skul i bilip long evolusen, na mi kisim dispela bilip, moa yet long taim mi skul long yunivesiti.

Wai na yu bilip long evolusen?

Mi bilip long ol profesa bilong mi. Na tu, mi ting olsem bun bilong sampela kain animal i wankain na  dispela i soim klia olsem olgeta animal i kamap long rot bilong wanpela animal tasol, na i sapotim dispela bilip olsem ol senis i save kamap long ol jin o miutesen i kamapim nupela kain animal.

Wai na bihain yu bin senisim tingting bilong yu?

Wanpela pren i bin singautim mi i go long miting bilong ol Witnes Bilong Jehova. Mi amamas long gutpela pasin pren bilong ol na ol gutpela tok mi harim. Bihain wanpela meri long dispela kongrigesen i visitim mi, na mi askim em, “Olsem wanem mi ken save olsem ol tok bilong Baibel i tru?”

Em i soim mi long ol tok profet bilong Baibel i stori long planti samting i kamap na i makim taim yumi stap long en. Wanpela eksampel, em tok profet bilong Jisas olsem long taim bilong las de wanpela kantri bai pait long narapela kantri, “ol bikpela guria,” na long planti hap “bai i gat ol bikpela sik na bikpela hangre.” a Na em i soim tu ol tok profet i stori long pasin bilong ol man bai i go nogut, na pasin bilong gridi na ol narapela pasin nogut bai go nogut moa yet olsem yumi lukim long nau. b I no longtaim, mi givim bel tru long stadi long Baibel na mi luksave olsem oltaim ol tok bilong en i save kamap tru. Na tu, mi wok long tingting olsem ating God i wokim olgeta samting i gat laip.

Wok painimaut bilong yu olsem dokta i helpim yu long save long hau ol samting i gat laip i bin kamap?

Yes. Taim mi kirap stadi long Baibel, long dispela taim mi wok long stadi long wok bilong katim na stretim skru bilong lek. Kirap long 1968 samting, ol saientis i kliagut moa long narakain wok bilong skru. Ol i painimaut olsem yumi no inap bendim skru i go long wanpela sait tasol olsem wanpela hinsis bilong dua samting, nogat. Ol join bilong skru i save rol na wok gut, dispela narakain wok i mekim na skru i muv long kain kain rot na i no hatwok long man i wokabaut, danis, na mekim planti narapela samting.

Inap 40 yia samting, ol saientis i bin traim long wokim giaman skru bilong lek. Tasol skru bilong ol man i narakain tru na i hatwok long wokim giaman skru i wok wankain olsem. Na tu, ol dispela giaman skru i no wankain olsem skru bilong yumi na ol i save stap sotpela taim tasol. Maski i gat olkain gutpela masin samting bilong yusim, ol man bilong wokim giaman skru i save amamas sapos skru ol i wokim i ken stap inap 20 yia. Ol sel long skru i save dai na nupela sel i kamap gen na kisim ples bilong ol. Mi luksave olsem skru bilong lek i kamapim klia tru savetingting bilong God, na i no kamap nating long rot bilong evolusen.

Yu gat wanem tingting long miutesen na long ol bun bilong sampela kain animal i wankain?

Ol samting i wankain long ol animal i makim olsem wanpela Man tasol i bin wokim olgeta. Na tu, miutesen i no helpim jin bilong ol animal o mekim ol i kamap gutpela moa, nogat. Miutesen i save bagarapim ol jin. Em tru olsem eksiden inap kamapim sampela gutpela samting. Olsem, long wanpela taun wanpela tren i bamim na brukim bris bilong pasim rot na bai ol ami i no ken kam bagarapim taun. Tasol dispela eksiden i no mekim taun i kamap gutpela moa, nogat. Olsem tasol, miutesen i no save mekim ol animal i kamap gutpela moa. Na miutesen i no inap kamapim wanpela gutpela samting olsem skru bilong lek bilong ol man o ol narapela hap bilong bodi.

Wai na yu kamap wanpela Witnes Bilong Jehova?

Taim mi bihainim ol stiatok bilong Baibel, i stap bilong mi i kamap gutpela moa. Na tu, long 2003, mi go long wanpela kibung intenesenel bilong ol Witnes Bilong Jehova na mi lukim pasin bilong olgeta long pas gut wantaim olsem wanpela famili, maski ol i no save long narapela narapela bipo. Ol i soim pasin laikim tru na mi laik stap olsem wanpela bilong ol.