Stori long taim yu liklik.

Famili bilong mi i lusim Frans na i go sindaun long Spen taim mi gat 9-pela krismas. Papamama bilong mi i bilong lotu Katolik, tasol mi no moa bilip long God taim mi gat 16 krismas. Mi ting lotu i no wanpela bikpela samting long laip. Sapos wanpela i askim mi olsem ol samting i gat laip i kamap olsem wanem sapos i no gat God, mi save tok: “Long nau ol saientis i no inap eksplenim dispela, tasol wanpela taim bihain ol bai mekim.”

Wanem samting i kirapim yu long stadi long ol sik bilong kidni?

Mi stadi long medikal skul long Montpellier, Frans. Wanpela profesa i tokim mi long wok long nifroloji, em wanpela wok dokta bilong skelim ol wok bilong kidni na ol sik i save kamap long kidni. Insait long dispela wok, dokta inap mekim ol wok painimaut na long wankain taim helpim ol sikman. Em samting mi gat laik tru long mekim. Long 1990, mi insait long stadi long wok bilong yusim homon recombinant erythropoietin (EPO) em wanpela kain kemikal long bodi we i save kontrolim wok bilong ol bun bilong yumi long kamapim ol retpela sel bilong blut. Long dispela taim, em wanpela nupela save ol dokta i wok long mekim wok painimaut long en.

Wanem samting i kirapim yu long tingting long God?

Long 1979, man bilong mi Floréal, i bin kirap stadi long Baibel wantaim ol Witnes Bilong Jehova. Tasol mi no gat laik long mekim olsem. Mi bin givap long lotu taim mi liklik. Maski i olsem, man bilong mi na ol pikinini bilong mi i kamap Witnes na i no longtaim olgeta pren bilong mipela ol i Witnes. Wanpela bilong ol em Patricia, em i tokim  mi olsem i gutpela mi traim long beten. Em i tok: “Sapos i no gat man long heven, orait i no gat wanpela samting bai kamap. Tasol sapos i gat, orait yu bai lukim sampela samting i kamap.” Sampela yia bihain mi wok long tingting long as bilong laip na mi tingim tok bilong Patricia. Mi kirap long beten bilong kisim gutpela tingting.

Wanem samting i kirapim yu long tingim as bilong laip?

Bagarap ol teroris i kamapim long Wol Tred Senta long New York i kirapim mi long tingim wai na i gat planti pasin nogut. Mi ting: ‘Ol bikhetlain bilong lotu i mekim pasin teroris na kilim ol man i dai, na i laik bagarapim sindaun bilong ol man long bihain. Tasol mi stap namel long ol Witnes Bilong Jehova em ol i stap bel isi. Ol i no bikhetlain. Ol i bihainim ol tok bilong Baibel. Mi ting i gutpela long mi skelim ol tok bilong Baibel.’ Olsem na mi kirap long ritim Baibel.

Olsem wanpela dokta, yu hatwok long bilip long wanpela Krieta?

Nogat. Mi gat bikpela rispek tru long narakain wok em bodi bilong yumi save mekim. Olsem, mi kirap nogut tru long hau kidni bilong yumi i save kontrolim ol retpela sel bilong blut insait long bodi bilong yumi.

Wai na yu tok olsem?

Yumi save olsem retpela sel bilong blut i save karim oksijen i go long olgeta hap bilong bodi. Sapos planti blut i lus long bodi, o sapos yu stap long wanpela ples i antap tru long maunten, bodi bilong yu bai sot long oksijen. Kidni inap pilim sapos oksijen i sot o i gat planti oksijen. Taim ol kidni i pilim olsem oksijen i sot, ol i kirap long wokim homon EPO, nau i gat planti tausen dispela homon EPO insait long blut. Orait homon EPO i kirapim gris bilong bun long wokim planti retpela sel bilong blut, na long dispela rot i gat planti oksijen long bodi. Em i gutpela samting tru! Mi stadi long dispela samting inap 10-pela yia, na mi kirap nogut long save olsem God tasol inap mekim kain gutpela samting olsem.

Yu gat wanem tingting long Baibel?

Mi bin ritim planti bilong ol histori buk na ol buk i gat nem, tasol wantu mi luksave olsem Baibel em i narapela kain. Ol tok bilong en i save helpim tru sindaun bilong ol man, em as na mi bilip olsem Baibel i kam long God. Mi laikim ol pasin bilong Jisas. Mi luksave olsem em i wanpela man i stap tru. Em i save pilim ol samting na em i gat ol pren. Mi no laik yusim ol buk na nius bilong ol Witnes Bilong Jehova, olsem na mi mekim wok painimaut long ol ensaiklopidia na ol narapela buk taim mi gat ol askim.

Yu mekim wok painimaut long wanem samting?

I gat planti samting mi ritim na kirap nogut long en, wanpela bilong ol em tok profet Baibel i mekim long yia Jisas i kisim baptais. Em i makim stret hamas taim bai lus namel long namba 20 yia bilong wok king bilong Artaserksis bilong Persia na yia em Jisas bai kamap Mesaia. a Mi save mekim wok painimaut na dispela em hap wok bilong mi. Olsem na mi mekim wok painimaut long ol histori buk bilong kamapim klia ol yia Artaserksis i mekim wok king na ol yia em Jisas i mekim ol wok bilong em long graun. Bihain mi luksave olsem ol dispela tok profet bilong Baibel i kamap tru long taim stret bilong en, olsem na God i as bilong ol dispela tok.