Peter Wadhams em profesa bilong stadim ol samting bilong solwara long University of Cambridge, Briten, i tok: “Ais i stap long taim bilong san long nau em inap 25 pesen tasol bilong ais i bin stap 30 yia i go pinis.” Long 2012, inap 50 sip i ron i go olsem long Solwara Bilong Hap Not bikos graun i wok long kamap hat moa na ol ais long dispela hap i melt.

Ol saveman i painimaut olsem susu wara em mama i save kamapim long ol de bihain long em i karim pikinini, i gat olsem 700 narapela narapela jem olsem baktiria, dispela i winim tru namba ol saveman i ting long en. Ol saveman i wok yet long painimaut olsem wanem ol dispela baktiria i helpim ol rop bilong bel bilong nupela bebi na i helpim bodi bilong bebi long sakim ol sik.

Long wanpela wok painimaut em ol saientis bilong Briten i mekim long tingting bilong ol man i save wok olsem wanem taim ol i draiv, ol i kisim save olsem tingting bilong ol draiva i gat sik kus i save wok isi isi moa, winim ol draiva em alkohol i paulim tingting bilong ol.

Ol i kilim i dai planti tausen elefan long olgeta yia bilong kisim tit bilong ol, em samting i no bin kamap bipo. Wanpela taim, ol man i sutim sampela elefan long het bilong ol na kilim ol i dai, i luk olsem ol i ron long helikopta na mekim olsem.

Insait long 27 yia i go pinis, 50 pesen bilong ol korol long Great Barrier Reef i wok long bagarap na pinis. Ol saientis i tok planti bilong ol dispela bagarap i kamap bikos long ol saiklon, wanpela kain sta pis em crown-of-thorns [Acanthaster planci] i kamap planti, na tempresa bilong solwara i go antap na bagarapim ol korol.