Taim yu na poroman marit bilong yu i kros, planti taim yu kamapim gen ol hevi i bin kamap bipo em yutupela i gat wok long stretim longtaim pinis. Dispela i soim olsem i gat wanem hevi i stap? Dispela i soim olsem yu o yutupela wantaim i no save long fogivim narapela.

Yu ken lain long fogivim narapela. Tasol pastaim, skelim as na man marit na meri marit i pilim hatwok tru long fogivim narapela narapela.

Bosim narapela. Sampela man na meri marit i no laik fogivim poroman bilong ol bambai ol i ken yusim dispela bilong bosim poroman. Bihain, taim kros i kamap, ol i toktok gen long hevi i kamap bipo bilong kontrolim poroman na mekim em i bihainim laik bilong ol.

Bel nogut. Sapos poroman i bin bagarapim bel bilong yu, ating yu no inap lusim tingting hariap long dispela. Ating poroman marit bai tok, ‘mi fogivim yu,’ tasol em i bel nogut yet i stap long samting i bin kamap na em i laik bekim rong.

Bel hevi. Sampela i marit bikos ol i ting laip bilong ol bai gutpela tru na ol bai stap amamas. Olsem na taim ol i no wanbel long wanpela disisen, ol yet i no laik senisim tingting na ol i ting hau na ‘gutpela poroman marit’ bilong ol i gat narapela tingting. Kain tingting olsem olgeta samting bai gutpela tru inap mekim na oltaim poroman i wok long painim rong bilong narapela na i no redi long fogivim em.

Kisim tingting kranki. Planti poroman marit i no laik fogivim poroman bilong ol bikos ol i kisim kain tingting kranki olsem:

Sapos mi fogivim em, mi mekim olsem rong bilong em i liklik samting tasol.

Sapos mi fogivim em, mi mas lusim tingting long samting i bin kamap.

Sapos mi fogivim em, em bai mekim rong yet long mi.

Tasol ol dispela tingting i no tru long pasin bilong fogivim narapela. Maski i olsem, i hatwok long fogivim narapela, na moa yet namel long man na meri marit.

Kliagut long ol samting i insait long pasin bilong fogivim narapela. Long Baibel, planti taim dispela tok “fogivim” i makim “lusim.” Olsem na pasin bilong fogivim narapela i no makim olsem yu mas lusim tingting long samting i kamap o ting em i liklik samting tasol. Sampela taim em inap makim olsem yu mas lusim tingting long samting i kamap bambai yu ken stap gut na marit bilong yu tu bai stap gut.

Luksave long ol hevi inap kamap sapos yu no fogivim narapela. Sampela saveman i tok pasin bilong bel nogut inap longpela taim, dispela inap mekim na yu kisim ol sik bilong bodi, na bilong bel na tingting, olsem sik dipresen na hai blut presa, na tu, dispela inap bagarapim marit bilong yu. Em as na Baibel i tok: “Mekim pasin helpim long narapela narapela, na sori tru long ol, na redi long fogivim narapela narapela.”—Efesus 4:32.

Luksave long gutpela samting inap kamap taim yu fogivim narapela. Pasin bilong fogivim narapela i helpim yu na poroman marit bilong yu long trastim narapela narapela na yupela i no tingim tingim ol rong bilong narapela narapela. Dispela pasin bai helpim yu long bosim gut bel na strongim pasin laikim.—Stiatok bilong Baibel: Kolosi 3:13.

Holim stretpela tingting. Em i isi long fogivim poroman marit bilong yu sapos yu tingim em olsem em i no gutpela olgeta na em i gat ol pasin kranki. Buk Fighting for Your Marriage i tok olsem sapos olgeta taim yu tingting long ol popaia bilong poroman marit bilong yu, yu bai lusim tingting long ol gutpela pasin bilong em. Na dispela buk i askim olsem: “Nau yet yu laik tingting long wanem ol pasin bilong em?” Tingim, i no gat wanpela man i gutpela olgeta na dispela i makim yu tu.—Stiatok bilong Baibel: Jems 3:2.

Bihainim gutpela tingting. Sapos neks taim yu bel hevi long toktok bilong poroman marit bilong yu o long samting em i mekim, askim yu yet: ‘Dispela em i bikpela samting? Mi mas strong long poroman marit i tok sori long mi, o mi ken lusim tingting tasol long dispela rong na mekim ol narapela samting?’—Stiatok bilong Baibel: 1 Pita 4:8.

Sapos inap, toktok long dispela samting. Long pasin isi kamapim wanem samting i mekim yu bel hevi na as na yu pilim olsem. No ken sutim tok, o mekim ol tok i strongim sait bilong yu, bikos dispela bai mekim na poroman marit bilong yu bai mekim ol tok bilong strongim sait bilong em tu. Toktok long olsem wanem pasin bilong poroman marit i mekim yu bel hevi.