Wanem samting i kirapim yu long stadi long saiens?

Taim mi go long yunivesiti, mi skul long kemistri. Mi amamas long kisim save long ol kemikal protin na nuklik asit em ol narakain liklik samting ol i kolim molekiul i save stap insait long olgeta samting i gat laip long graun. I no longtaim, mi kirap nogut long hau sampela molekiul i save kisim lait bilong san.

Yu bin bilip long God?

Mi bin bilip long God taim mi liklik mangi. Tasol bihain taim mi skul long Catholic University of Leuven, mi kisim skul olsem olgeta samting i gat laip i kamap nating long rot bilong evolusen. Ol profesa i tok sampela bilong ol dispela samting i hatwok long kliagut long en. Ol i save gut long ol wok saiens inap planti yia, olsem na mi bilipim olgeta tok bilong ol. Bihain, mi hatwok long bilip olsem i gat God i stap.

Wanem samting i mekim na yu tingting gen long ol samting i gat laip i bin kamap olsem wanem?

Long 1999, mi bungim wanpela pren wanskul husat i kamap wanpela Witnes Bilong Jehova, na mi go long wanpela miting bilong ol. Na tu, long dispela taim wanpela Witnes Bilong Jehova i kam long haus bilong mipela na i givim buk Is There a Creator Who Cares About You? a

Yu gat wanem tingting long dispela buk?

Mi pilim tru bikpela wok painimaut ol i mekim bilong raitim dispela buk. Mi wok long tingting olsem tru tru evolusen i stori gut long ol disain bilong ol samting i gat laip o nogat.

Yu kirap nogut long disain bilong wanem samting?

Olsem wanpela saientis, mi save stadim disain bilong sampela  kain molekiul i save stap insait long wanpela mosong bilong solwara (cyanobacteria) em yumi no inap lukim long ai, na ol i save wokim kaikai bilong ol yet. Sampela saientis i ting ol dispela mosong em ol fes samting i gat laip i bin stap long planet bilong yumi. Ol i save kisim strong i kam long lait bilong san na yusim dispela bilong tanim wara na win kabon daioksait i kamap olsem kaikai bilong ol, tasol ol saientis i no kliagut long hau ol i mekim olsem. Mi kirap nogut tu long hau ol dispela mosong i save wok strong tru long kisim lait bilong san.

Ol lip tu i save yusim san lait long wokim kaikai. So olsem wanem ol dispela mosong i narapela kain?

Sapos yu go daun tru insait long solwara, i no gat planti lait bilong san. Olsem na ol dispela mosong i stap long as bilong solwara ol i mas kisim olgeta liklik hap strong bilong san lait em ol inap kisim, na ol i mekim olsem long rot bilong ol narakain antena bilong ol. Wanem liklik strong bilong san ol i kisim, ol i yusim gut bilong wokim kaikai bilong ol. Disain long dispela mosong bilong kisim lait, i pulim tingting bilong ol man bilong wokim ol sola panel. Tasol ol sola panel ol man i wokim, ol i no wok wankain liklik olsem wok bilong ol dispela liklik mosong.

Dispela i kirapim yu long kisim wanem tingting?

Mi tingim ol ensinia husat i lukim ol dispela samting i gat laip na i laik wokim ol samting i wok wankain olsem ol, dispela i mekim na mi kisim tingting olsem God i wokim olgeta samting i gat laip. Maski i olsem, ol stadi bilong saiens tasol i no mekim na mi bilip long God, nogat. Mi stadi gut tru long ol tok bilong Baibel na dispela tu i as bilong bilip bilong mi.

Wanem samting i kirapim yu long bilip olsem Baibel i kam long God?

Wanpela bilong ol samting i kirapim mi long bilip em truim bilong ol tok profet bilong Baibel. Olsem, planti handret yia paslain, Aisaia i bin kamapim planti tok long i dai bilong Jisas na ol bai planim em olsem wanem. Aisaia i bin raitim dispela tok profet paslain long i dai bilong Jisas bikos Rait Bilong Aisaia em ol man i bin painim long Kumran, em kopi ol man i bin raitim 100 yia paslain long Jisas i bon.

Dispela tok profet i tok: “Ol i planim em wantaim ol man i bin mekim ol kain kain pasin nogut, na wantaim ol man i gat planti mani samting.” (Aisaia 53:9, 12) Tru tumas, ol i kilim Jisas i dai wantaim ol man bilong mekim ol pasin nogut, tasol ol i planim em long matmat bilong wanpela famili i gat planti mani kago. Em wanpela bilong planti tok profet bilong Baibel i kamap tru na i kirapim mi long bilip olsem God yet i as bilong olgeta tok bilong Baibel. (2 Timoti 3:16) I no longtaim, mi kamap wanpela Witnes Bilong Jehova.

Bilong wanem yu amamas long stap olsem wanpela Witnes Bilong Jehova?

Bilip bilong yumi i stret wantaim ol save bilong saiens. Na tu, Baibel tasol i as bilong ol stiatok we i save stiaim wokabaut bilong yumi. Nau mi stap wanpela Witnes Bilong Jehova, na mi amamas long tokim ol narapela long ol gutpela tok bilong Baibel na helpim ol long kisim bekim bilong ol askim bilong ol.