“Bel bilong mi i gat bikpela hevi tru, na mi bagarap. Long olgeta de mi sori na krai tasol.”—Song 38:6.

OL SAVEMAN I TOK

Olgeta man i save bel hevi sampela taim, tasol sik bilong bikpela bel hevi o sik dipresen em wanpela sik i save stap longpela taim na i pasim man long mekim ol samting em i save mekim long olgeta de. Planti saveman i tok “nomol” bel hevi em i no wankain long bel hevi man i save pilim taim em i gat “sik dipresen.” Tasol i stret long tok sampela man i save pilim bikpela bel hevi tru, na sampela taim ol i pilim olsem ol i no gutpela tumas na bel i kotim ol long sampela rong ol i bin mekim bipo.

TOK BAIBEL I MEKIM

Baibel i stori long planti man na meri em ol i bin gat ol bikpela bel hevi. Olsem, Hana “i pilim nogut tru”—em wanpela tok ol i tanim olsem “bel i bagarap olgeta” na “bikpela bel hevi.” (1 Samuel 1:10) Wanpela taim profet Elaija i pilim bel hevi tru na em i beten long God i ken larim em i dai!—1 King 19:4.

Ol Kristen long taim bilong ol aposel i kisim tok long ol i mas “mekim gut bel bilong ol man i bel hevi.” (1 Tesalonaika 5:14) Wanpela buk i tok, dispela tok “ol man i bel hevi” inap makim ol man “em ol hevi bilong laip i daunim ol olgeta inap liklik taim.” I klia tru olsem ol bilip man na meri long taim bilong Baibel, ol tu i bin bel hevi sampela taim.

“Olgeta samting God i wokim, ol i wok long krai na pilim pen wantaim.”—Rom 8:22.

TOK BAIBEL I MEKIM

Baibel i skulim yumi olsem taim namba 1 man na meri i bikhet long God, ol i mekim sin, na long dispela rot sik i kamap. Olsem, Song 51:5 i tok: “Taim mama i karim mi, mi kamap man bilong mekim pasin nogut. Taim mi stap yet long bel bilong mama, mi man bilong mekim sin.” Na Rom 5:12 i tok “long rot bilong wanpela man [namba 1 man, Adam] tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” Yumi kisim sin long rot bilong Adam, olsem na yumi no inap abrusim sik, maski em sik bilong bodi o sik bilong tingting. Olsem na Baibel i tok: “Olgeta samting God i wokim, ol i wok long krai na pilim pen wantaim.” (Rom 8:22) Tasol Baibel i tok promis long gutpela samting we i no gat wanpela dokta bilong graun inap kamapim—em dispela tok promis olsem God bai kamapim nupela taim we bai no gat olgeta kain sik na sik dipresen tu bai no gat.—Revelesen 21:4.

“God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”—Song 34:18.

AS NA EM I BIKPELA SAMTING

I no olgeta taim yu inap kontrolim ol samting i kamap long yu, na sampela taim ol samting nogut inap painim yu. (Saveman 9:11, 12) Tasol yu inap mekim ol gutpela wok na bai bel hevi i no ken daunim yu olgeta.

TOK BAIBEL I MEKIM

Baibel i tok ol man i gat sik i mas kisim helpim long dokta. (Luk 5:31) Olsem na sapos yu wok long pilim bikpela bel hevi olsem dipresen, i no gat rong long yu kisim helpim long wanpela dokta. Na tu, Baibel i tok pasin bilong beten inap helpim yumi. Olsem, Song 55:22 i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” Beten i no wanpela samting bilong mekim yu pilim gut tasol, nogat, em rot bilong toktok wantaim God Jehova, em Man i stap klostu long “ol manmeri i gat hevi.”—Song 34:18.

Yu inap kisim helpim tu long rot bilong kamapim tingting bilong yu long wanpela gutpela pren. (Sindaun 17:17) Daniela, em wanpela Witnes Bilong Jehova, i tok: “Wanpela wanbilip i toktok gut wantaim mi na em i helpim mi long toktok long sik dipresen bilong mi. Maski inap planti yia mi no laik toktok long dispela samting, tasol mi luksave olsem mi mas mekim. Mi kirap nogut olsem mi pilim gut bihain long mi mekim olsem.”