Stretpela pasin em wanem samting? Em ol gutpela pasin na ol stiatok em yumi ting ol i bikpela samting bilong helpim yumi. Olsem ol pasin bilong fogivim, onest, stap fri, laikim, rispektim laip, na bosim gut bel. Olsem na ol stretpela pasin i save stiaim pasin yumi mekim, ol bikpela samting long laip, pasin pren bilong yumi wantaim ol narapela, na tu, ol lo yumi givim bilong stiaim ol pikinini bilong yumi. Maski stretpela pasin i bikpela samting, planti man i no moa bihainim dispela pasin.

Long 2008, ol saveman long Amerika i intaviuim planti handret yangpela long tingting ol i gat long stretpela pasin. David Brook i raitim tok long niuspepa The New York Times olsem: “Mi bel hevi olsem tingting na toktok bilong ol i soim olsem stretpela pasin i samting nating.” Planti i pilim olsem reip na kilim man i dai em ol bikpela rong, tasol “ol i ting olsem i no gat rong long dring alkohol na draiv, lukstil long wok bilong narapela long skul, o i no stap gut long poroman marit.” Wanpela yangpela i tok long dispela olsem: “Mi no wari tumas long wanem samting i rait na wanem samting i rong.” Planti i gat tingting olsem: ‘Sapos yu pilim olsem i stret  long mekim, mekim tasol. Bihainim tingting bilong yu.’ Yu ting dispela tingting em i stret?

Bel na tingting inap kirapim yumi long laikim tru na sori tru long narapela, tasol tu em inap kirapim yumi long kisim ‘pasin giaman na tingting nogut.’ (Jeremaia 17:9) Sori tru, dispela kain pasin i stap ples klia long pasin bilong ol man long nau long lusim stretpela pasin, em samting Baibel i tok profet long en. Longtaim pinis, Baibel i tok ‘long taim bilong las de, ol man bai laikim ol yet tasol, laikim tumas mani, litimapim nem bilong ol yet, i gat pasin antap, i no gat pasin bilong bosim bel, na ol bai kamap wail olgeta.’ Na tu, “ol bai i no laikim ol gutpela pasin” na “ol bai laikim kain kain amamas” na ol i no laikim God.—2 Timoti 3:1-5.

Dispela i mas kirapim yumi long skelim gut tingting bilong yumi yet na yumi no bilip nating long en! Baibel i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting.” (Sindaun 28:26) Dispela ves i soim olsem yumi mas skulim gut tingting bilong yumi na bai i stret wantaim ol stretpela pasin na dispela bai helpim yumi. Yumi inap kisim we ol stretpela pasin? Planti man i bilip long Baibel bikos ol tok bilong en i kamapim savetingting na i stret tru.

Baibel i kolim sampela pasin em ol i gutpela bilong helpim ol man. Tingim sampela eksampel olsem pasin laikim, pasin helpim, pasin bilong givim samting, na onest pasin.

Laikim ol narapela.

Buk Engineering Happiness—A New Approach for Building a Joyful Life i tok: “Sapos yu bin lain long laikim ol narapela, orait laip bilong yu bai pulap long amamas.” I klia tru olsem, pasin laikim em samting yumi ol man i nidim. Sapos i no gat pasin laikim, yumi no inap tru long stap amamas.

Tok Baibel i mekim: “Yupela i mas werim pasin laikim olsem yupela i werim klos, long wanem, pasin laikim em i nambawan gutpela rot bilong mekim ol man i kamap wanbel.” (Kolosi 3:14) Man i raitim dispela hap bilong Baibel i tok: “Sapos mi . . . no gat pasin laikim, orait mi olsem samting nating.”—1 Korin 13:2.

Dispela i no makim pasin laikim namel long man na meri o samting man i pilim nating long bel, nogat; i gat stiatok i bosim dispela pasin. Dispela pasin laikim i save kirapim yumi long helpim man i nidim helpim na yumi no tingting long em i mas bekim. Buk 1 Korin 13:4-7, i tok: “Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em. Em i no save amamas long ol pasin i no stret, nogat, em i save amamas long ol pasin i tru. Em i no save larim wanpela samting i daunim em, . . . em i save sanap strong long olgeta hevi i kamap long em.”

Taim ol famili i no gat kain pasin laikim, dispela i save nogutim olgeta, na moa yet ol pikinini. Wanpela meri nem bilong em Monica i tok taim em i liklik em i bin karim hevi long ol narapela i paitim em, bagarapim bel na tingting bilong em, na mekim pasin sem long em. Em i tok: “I no gat wanpela i laikim mi na mi no gat gutpela samting bilong wetim i kamap bihain.” Taim em i gat 15 krismas, em i go stap wantaim tumbuna papamama bilong em ol i Witnes Bilong Jehova.

 Monica i tok: “Long tupela yia mi stap wantaim ol, maski mi meri bilong sem, ol i skulim mi long kisim pasin bilong toktok, pasin laikim, na pasin bilong tingim ol narapela. Ol i helpim mi long kamap gutpela meri.” Nau, Monica i marit na em wantaim man na 3-pela pikinini bilong em ol i soim pasin laikim long ol narapela long rot bilong autim tok bilong Baibel long ol.

Samting i save nogutim pasin laikim em pasin bilong laikim tumas mani kago, em tingting man i gat olsem ol kago na amamas i nambawan gutpela samting. Planti wok painimaut i soim olsem ol man i gat liklik mani tasol, ol inap stap amamas. Ol man i laikim tumas mani kago, ol i wok long mekim samting i tekewe amamas bilong ol, na Baibel i sapotim dispela tingting. Saveman 5:10 i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em. Olsem na dispela pasin bilong laikim tumas mani samting, em i no gat as bilong en.” Baibel i tok moa: “Long sindaun bilong yupela, yupela i no ken bihainim pasin bilong laikim tumas mani.”—Hibru 13:5.

Pasin helpim na pasin bilong givim.

Wanpela atikol bilong lain The Greater Good Science Center long University of California, Berkeley, long Amerika, i tok: “Em bai gutpela samting tru sapos i gat wanpela stua em yu ken go na baim amamas? Yu inap kisim kain amamas sapos samting yu go baim long stua i bilong givim long narapela na i no bilong yu yet.” Wanem poin bilong dispela tok? Pasin bilong givim i save mekim yumi amamas moa, winim amamas bilong kisim.

Tok Baibel i mekim: “Amamas bilong givim samting i winim amamas bilong kisim samting.”—Aposel 20:35.

Planti taim, nambawan gutpela rot bilong givim samting na i save bringim amamas em long givim yumi yet, olsem givim taim na strong bilong yumi. Olsem, wanpela meri nem bilong em Karen i lukim 3-pela meri—wanpela mama na 2-pela pikinini meri bilong em i sindaun long kar em bonet bilong en i op. Mama na wanpela pikinini meri i mas kalap long balus, tasol kar i no inap stat na teksi ol i ringim i no kam yet. Karen i tok long kisim ol i go, maski em i mas draiv inap 45 minit long kamap long ples balus. Ol i orait long go wantaim Karen. Taim Karen i lusim ol pinis na i kam bek, em i lukim narapela pikinini meri i sindaun yet long kar long kar pak.

Meri i tok: “Man bilong mi i wok long draiv i kam.”

Karen i tok: “Em gutpela olsem yu orait. Mi bai go stretim gaden long Haus Kingdom o haus lotu bilong mipela.”

Meri i askim: “Yu wanpela Witnes Bilong Jehova?”

Karen i tok: “Yes,” na tupela i stori liklik.

Sampela wik bihain, Karen i kisim wanpela pas. Wanpela hap bilong pas i tok: “Mitupela Mama i no lusim tingting long gutpela pasin yu bin mekim. Mipela i kalap long balus na kam kamap pinis, tenkyu tru! Susa bilong mi i tok yu wanpela Witnes Bilong Jehova, nau mipela i save long as na yu bin mekim gutpela pasin long mipela. Mama bilong mi em i Witnes, na mi bin lusim miting na wok autim inap longtaim pinis. Tasol klostu nau bai mi kirap gen long mekim! Karen i amamas tru olsem em i bin helpim  tupela wanbilip bilong em. Em i tok: “Mi aiwara.”

Man bilong raitim buk, Charles D. Warner i tok: “Wanpela gutpela samting tru long . . . laip em olsem taim wanpela i givim bel long helpim narapela, em i helpim em yet.” Dispela em i tru bikos God i no wokim yumi bilong tingim yumi yet tasol, nogat, em i wokim yumi bilong kamapim ol gutpela pasin bilong em.—Stat 1:27.

Onest pasin.

Dispela pasin em i bikpela samting long olgeta manmeri. Pasin giaman i save kamapim pasin bilong pret, i no trastim narapela, na ol narapela pasin nogut.

Tok Baibel i mekim: “Husat inap i stap long haus bilong [God]?” Bekim em: “Man i bihainim laik bilong God . . . na i save tok tru oltaim.” (Song 15:1, 2) Wankain olsem ol narapela pasin yumi skelim pinis, onest pasin i stap pinis long skin bilong yumi. Sindaun o laik bilong skin i no bosim dispela pasin.

Tingim Christina husat i bin painim beg mani? Em i gat laik long amamasim God, na em i no tingting long kisim bikpela mani. Olsem na taim papa bilong mani i kam, Christina i tokim em olsem beg mani bilong em i stap. Bisnisman i kirap nogut long onest pasin bilong em. Bos bilong em tu i amamas long em na bihain bos i makim Christina i kamap maneja bilong faktori—em wok i gat namba. Tok bilong 1 Pita 3:10 i tru: “Man i laik bai laip bilong en i gat amamas long en na sindaun bilong em i gutpela, dispela man i mas bosim maus bilong en na em i no ken . . . tok giaman.”

Ol stretpela pasin Baibel i kolim i soim olsem Man Bilong Wokim yumi i laikim yumi tru, na dispela i helpim yumi long “wokabaut long rot bilong ol gutpela man.” (Sindaun 2:20; Aisaia 48:17, 18) Taim yumi bihainim ol dispela tok, yumi soim olsem yumi laikim God na yumi kisim planti blesing. Baibel i tok promis olsem: “Bihainim pasin bilong [God]. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.”—Song 37:34.

Tru tumas, gutpela samting tru bai painim ol manmeri i bihainim ol stretpela lo bilong Baibel—ol bai kisim laip long graun we gutaim bai stap na olgeta pasin nogut bai pinis! Olsem na em i bikpela samting long yumi bihainim ol stretpela pasin em Baibel i skulim yumi long en.