Nius i Kam Long Olgeta Hap
Jemani
Long 2012, wanpela bilong ol nambawan bikpela kot bilong Jemani i tok ol manmeri i no inap risain long lotu na kirapim wok lotu bilong ol yet na long wankain taim stap yet olsem memba bilong lotu. Ol Katolik em ol i risain long lotu na ol i no baim takis, tasol ol i mekim yet wok lotu bilong ol, misin inap tambuim ol long Komiunio, konpesio, holim wok insait long lotu, na tu, ol i no inap mekim fiuneral bilong ol long sios taim ol i dai.
Graun olgeta
Wanpela wok painimaut ol i mekim long olgeta lotu long graun i soim olsem 1.1 bilion manmeri ol i “no insait long wanpela lotu,” tasol dispela i no makim olsem ol i no bilip long God. Ol i namba 3 bikpela lain. Lotu Kristen i namba 1 bikpela lain inap 2.2 bilion, na lotu Islam i namba 2 bikpela lain inap olsem 1.6 bilion. Lotu Hindu em namba 4 bikpela lain inap olsem 1 bilion.
Japan
Ol saientis bilong Japan i painimaut olsem taim man i kisim “tok amamas, dispela i mekim sampela samting long kru bilong em” na i kirapim em long “pilim amamas.” Dispela i strongim tingting olsem pasin bilong givim tok amamas em i gutpela rot bilong kirapim man long mekim gut moa ol samting.
Bolivia
Long pinis bilong 2012, kantri Bolivia i wokim sensas. Bilong sensas i ken ron gut, gavman i tok ol manmeri long Bolivia i mas i stap long haus long de bilong sensas. Na tu, ol i tambuim ol man long draivim kar long rot, ol i pasim ol boda, na tambuim ol man long dring alkohol.
Itali
Long wanpela wok painimaut, planti papamama long Itali i tok ol i save pilai wantaim ol pikinini bilong ol inap 15 minit long olgeta de. Nius La Repubblica i tok: “Long olgeta 5-pela 5-pela papamama, wanpela i ting pasin bilong pilai i helpim pikinini long lainim planti samting.” Andrea Angiolino em man bilong wokim ol bod-gem i tok, long rot bilong pilai, ol papamama i helpim ol pikinini bilong ol long wokim tingting na “tingim ol lo.”