OL DISPELA meri i no sik. Ol i ekspiriensim menopos, em wanpela senis i save kamap long laip bilong ol meri we ol i no moa kisim sik mun taim ol i gat 50 krismas samting. Sapos yu wanpela meri, yu kamap pinis long kain krismas olsem? Dispela samting i wok long painim yu? Maski i olsem, sapos yu na famili bilong yu i save long ol samting bilong menopos, dispela bai helpim yu long winim ol hatwok bilong en.

Haptaim we senis i save kamap long bodi bilong meri em ol i kolim perimenopos, dispela i makim haptaim we sampela taim meri i kisim sik mun na sampela taim nogat, i go inap long taim we meri i no moa kisim sik mun. b Planti taim, dispela tok “menopos” i makim dispela haptaim olgeta.

Long planti meri, perimenopos bilong ol i save kirap long taim ol i gat 40 krismas samting, tasol long sampela meri dispela haptaim i save kirap taim ol i gat 60 krismas samting. Planti taim, isi isi taim bilong meri long kisim sik mun bai i go pinis olgeta. Sampela taim bodi i no wokim homon, na meri i abrusim taim bilong em long kisim sik mun, kisim sik mun long taim em i no ting long en, o em i kisim sik mun we bodi i lusim planti blut. Long sampela meri, dispela senis i kamap wantu tasol, na ol i no moa kisim sik mun.

Buk Menopause Guidebook i tok: “Long olgeta meri, samting i painim ol long taim bilong menopos i narapela narapela.” Buk i tok moa: “Wanpela hevi i save painim planti meri long taim bilong menopos em ol i save pilim  skin i hat tru” na bihain ating ol i pilim kol tru. Dispela i save distebim slip bilong ol na pinisim strong bilong ol. Dispela hevi i save stap hamas yia? Buk The Menopause Book, i tok: “Sampela meri i save pilim skin hat inap wanpela o tupela yia long taim bilong menopos. Sampela narapela meri i karim dispela hevi inap planti yia, na sampela i tok ol i pilim skin i hat wan wan taim inap long laip olgeta bilong ol.” c

Ol senis long homon long bodi bilong meri inap mekim na meri inap pilim bikpela bel hevi, bel na tingting i no stap gut, na em i pilim olsem em i laik krai tasol, na tu, em i hatwok long putim gut tingting o lusim tingting long ol samting. Buk The Menopause Book i tok: “Dispela i no makim olsem olgeta meri bai ekspiriensim olgeta dispela samting long taim bilong menopos, nogat.” Sampela meri i ekspiriensim sampela tasol bilong ol dispela hevi na i no olgeta.

Ol liklik senis yu mekim long sindaun bilong yu inap daunim sampela hevi bilong menopos. Olsem, sapos yu save smok, i gutpela yu lusim dispela pasin na bai yu daunim skin hat bilong yu. Planti meri i pilim olsem gutpela samting i kamap taim ol i senisim ol kaikai na dring samting olsem kisim liklik o lusim alkohol, lusim ol dring i gat kafin, ol kaikai i gat spais o planti suga, em ol samting inap mekim skin i hat. Em i bikpela samting long kaikai gut na kisim ol kaikai we inap lukautim helt bilong yu.

Eksasais tu inap helpim yu long daunim ol hevi bilong menopos. Olsem, eksasais inap helpim yu long kisim gutpela slip, pilim gut na amamas, strongim bun bilong yu, na tu, lukautim helt bilong yu. d

Rondro, em mipela i kamapim pinis tok bilong em, i tok: “I no olsem yu wanpela i mas karim dispela hevi na yu no laik toktok long dispela samting. Sapos yu toktok wantaim famili bilong yu long dispela samting, ol bai i no tingting planti taim ol i lukim yu ekspiriensim ol hevi bilong menopos.” Ating ol bai i no les kwik na ol bai pilim hevi bilong yu. Baibel long 1 Korin 13:4 i tok: “Man i gat pasin laikim em i no save les kwik.”

Planti meri, na tu, ol meri em ol i bel hevi olsem ol i no inap karim pikinini moa, ol i pilim olsem pasin bilong beten i helpim ol. Baibel i tok: “Long olgeta pen na hevi i kamap long yumi, [God] i save mekim isi bel bilong yumi.” (2 Korin 1:4) Gutpela samting em olsem, menopos i bilong sotpela taim tasol. Bihain, ol meri husat i wok yet long lukautim gut helt bilong ol bai kisim nupela strong na ol bai i gat gutpela laip inap planti yia.