BAIBEL I TOK WANEM
Marit
Yu ting marit em pasin bilong ples tasol we man na meri i sindaun wantaim?
“Samting God i pasim pinis, man i no ken katim.”—Matyu 19:6.
BAIBEL I TOK
Long ai bilong God, marit em i bikpela samting moa na em i no pasin bilong ples tasol we man na meri i sindaun wantaim. Marit em samting i holi na i pasim man na meri wantaim. Baibel i tok: “Kirap long taim God i wokim ol man long graun, ‘Em i wokim ol i kamap man na meri. Olsem na man bai lusim papa na mama bilong en, na tupela bai kamap wanpela bodi.’ . . . Olsem na samting God i pasim pinis, man i no ken katim.” a—Mak 10:6-9; Stat 2:24.
Dispela tok, “samting God i pasim pinis” i no makim olsem God i makim pinis husat i mas maritim husat, nogat. Baibel i tok, Man Bilong Wokim yumi em i As bilong marit na dispela i makim olsem marit em i bikpela samting. Tupela marit i gat dispela tingting, ol i save tingim marit olsem samting i holi na i bilong stap oltaim oltaim, na ol i wok strong long mekim marit bilong ol i stap gut. Ol i helpim marit bilong ol i stap gut moa taim ol i larim Baibel i stiaim ol long inapim wok bilong ol olsem man na meri marit.
Wanem wok bilong man marit?
“Maritman em i stap het bilong meri bilong en.”—Efesus 5:23.
BAIBEL I TOK
Bilong famili i ken wok gut wantaim, wanpela insait long famili i mas go pas long mekim ol disisen. Baibel i givim dispela wok long man marit. Tasol dispela i no makim olsem em i bos na em i mas mekim hatpela pasin. Na tu, dispela i no givim rait long em long abrusim ol wok bilong em insait long famili, na dispela i mekim na meri i no rispek long em na i putim planti hevi long meri bilong em. God i laik em i mas wok hat long lukautim meri bilong em na givim ona long em olsem poroman tru bilong em we em i trastim. (1 Timoti 5:8; 1 Pita 3:7) Efesus 5:28 i tok: “Ol maritman i mas laikim meri bilong ol olsem ol i laikim bodi bilong ol yet.”
Man marit husat i laikim tru meri bilong em i save tingim tru ol gutpela pasin bilong em na save meri i gat bilong mekim ol wok, na em i rispektim tingting meri i kamapim long sampela disisen em i mas mekim bilong famili olgeta. Em i no ken ting olsem em i het bilong famili na em i strong long ol i bihainim laik bilong em. Taim bilipman Abraham i no laik harim gutpela tingting meri bilong em i kamapim long sampela samting bilong famili, God Jehova i tokim em: “Yu mas bihainim tok bilong Sara.” (Stat 21:9-12) Long pasin daun, Abraham i mekim olsem, na famili bilong em i stap bel isi na pas gut wantaim na God i blesim ol.
Wanem wok bilong meri marit?
“Yupela maritmeri, yupela i mas daun long ol man bilong yupela.”—1 Pita 3:1.
BAIBEL I TOK
Paslain long God i wokim meri bilong Adam, God i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” (Stat 2:18) God i wokim meri olsem poroman bilong man. God i no wokim meri bilong stap wankain long man o bilong winim em, nogat, em i wokim meri bilong stap olsem gutpela helpim bilong man. Tupela wantaim i ken inapim wok God i givim long ol long kamapim ol pikinini na pulapim graun olgeta.—Stat 1:28.
Bilong meri i ken mekim gut wok bilong em, God i wokim gutpela bodi bilong em na givim em save na inapim em long pilim ol samting long bel na tingting. Taim em i yusim gut ol dispela samting na mekim pasin laikim, em i mekim bikpela samting bilong helpim marit i stap gut na em i helpim man bilong em long stap amamas na bel na tingting bilong man i stap gut. Long ai bilong God, i stret man i litimapim nem bilong kain meri olsem. b—Sindaun 31:28, 31.
a Baibel i orait long divos sapos poroman marit i mekim pasin pamuk.—Matyu 19:9.
b Ol marit bai kisim gutpela tok bilong helpim marit na famili laip bilong ol long atikol “Bilong Helpim Famili” i save kamap olgeta taim long nius Kirap!
Ating Yu Bai Laikim Tu
FAMILI BILONG YU INAP I STAP AMAMAS
Bihainim Tok Bilong God na Marit Bai Stap Amamas
Tupela askim we inap helpim marit bilong yu long kamap gut.
BEKIM BILONG OL ASKIM BILONG BAIBEL
Baibel i Tok Wanem Long Man na Meri i Sindaun Nating Wantaim na i No Marit?
God i tokim yumi long rot bilong famili i ken i stap amamas, na ol bilong God i save helpim ol manmeri i bihainim ol dispela lo.
