“I no gat wanpela man i bin lukim God long wanpela taim.”—Jon 1:18.

TOK OL MAN I MEKIM

Planti man i no bilip olsem Jisas em i God. Tasol sampela i kamapim ol ves bilong Baibel em ol i ting i makim olsem Jisas em i wankain long God.

TOK BAIBEL I MEKIM

Baibel i no mekim wanpela tok olsem Jisas em i God i Gat Olgeta Strong o em i wankain long God, nogat. Tasol Baibel i kamapim klia olsem Jisas i aninit long God. Olsem, Baibel i kamapim tok Jisas i mekim, em i tok: “Papa i winim mi.” (Jon 14:28) Na tu, Baibel i tok: “I no gat wanpela man i bin lukim God long wanpela taim.” (Jon 1:18) Olsem na i no stret long ting olsem Jisas em i God bikos planti man i bin lukim Jisas.

Ol disaipel bilong Jisas long bipo i no bin tok Jisas em i God. Olsem, Jon em man bilong raitim Gutnius i tok long samting em i raitim olsem: “Ol tok i stap long dispela skrol ol i stap bai yupela i ken bilip olsem Jisas em i Krais, Pikinini bilong God.”—Jon 20:31. a

“I gat ol wasman bilong sipsip ol i stap ausait na was long ol sipsip bilong ol long nait.”—Luk 2:8.

TOK OL MAN I MEKIM

Sampela man i selebretim Krismas long Disemba 25 bikos ol i ting Jisas i bin bon long dispela de. Ol narapela i tingim betde bilong Jisas long kirap bilong mun Janueri.

TOK BAIBEL I MEKIM

Baibel i no kolim stret de Jisas i bin bon. Tasol Baibel i stori olsem long taim Jisas i bon, “i gat ol wasman bilong sipsip ol i stap ausait na was long ol sipsip bilong ol long nait.” (Luk 2:8) I no stret long ting olsem ol dispela wasman bai larim ol sipsip i stap ausait long ol nait bilong mun Disemba na Janueri. Bilong wanem yumi tok olsem?

Long hap we Jisas i bon, long mun Disemba na Janueri em taim bilong bikpela kol tru. Baibel i stori olsem long dispela taim bilong yia, “bikpela ren i kam daun na i wok long wasim olgeta man na mekim ol i guria.” (Esra 10:9, 13; Jeremaia 36:22) Dispela i no gutpela taim long ol wasman bilong sipsip long “stap ausait” wantaim ol sipsip bilong ol.

“God i kirapim [Jisas] bek long dai.”—Aposel 3:15.

TOK OL MAN I MEKIM

Sampela man i hatwok long bilip olsem ol man i dai pinis inap kirap bek, na tu, ol i no bilip long kirap bek bilong Jisas.

TOK BAIBEL I MEKIM

Jisas i skulim ol disaipel bilong em olsem em bai “karim planti pen na hevi” na “ol man bai kilim em i dai na long namba 3 de bai em i kirap bek.” (Matyu 16:21) Baibel i tok taim ol i kilim Jisas i dai na em i kirap bek, em i kamap long winim 500 manmeri. (1 Korin 15:6) Ol dispela aiwitnes i no gat tupela tingting, ol i bilip tru olsem Jisas i kirap bek. Na ol i redi long dai bilong holimpas dispela bilip!—Aposel 7:51-60; 12:1, 2.

AS NA EM I BIKPELA SAMTING

Baibel i skulim yumi olsem dai na kirap bek bilong Jisas i opim rot long ol manmeri i ken stap long Paradais long graun, em Baibel i tok promis long en. (Song 37:11, 29; Revelesen 21:3, 4) Yumi gat rot long kisim laip oltaim na stap amamas long Paradais long graun, olsem na yumi tenkyu long pasin laikim bilong Jisas na Papa bilong em Jehova, em God i Gat Olgeta Strong.—Jon 3:16; Rom 6:23.