Wanpela wok painimaut i soim olsem pasin bilong harim musik na toktok long fon samting i bin pulim nabaut tingting bilong 33 pesen bilong ol man i wokabaut brukim ol bikrot. Samting i nogut moa em pasin bilong salim teks mesis. Lain bilong salim teks mesis i save kisim 18 pesen moa taim long brukim rot winim ol narapela, na ol i gat 3.9 taims sans long sakim trafik lait, brukim rot long rong hap, na i no lukluk long tupela sait rot paslain long brukim rot.

Ol man i kisim ol meri long Naijiria i go long Yurop bilong mekim wok pamuk na ol dispela meri i promis long tempel bilong ol spirit nogut olsem ol bai no inap tokaut long dispela. Bilong bosim ol na bai ol i stap yet olsem ol pamukmeri, ol dispela man i pretim ol olsem ol spirit bai mekim nogut long ol.

Inap 5 i go 10 pesen bilong ol man i no gat wok mani, ol i save rausim yunivesiti digri na ol bikpela wok ekspiriens long CV bilong ol bikos ol dispela samting i mekim na i luk olsem ol i gat bikpela save tumas.

Long ol kantri i stap rabis, inap 4 milion manmeri i save dai olgeta yia long sik sotwin, bronkaitis, na strongpela kus, na wanpela bikpela as em ol i save pulim smok nogut i kam long ol stov ol i kuk long en we i no gat paip bilong rausim smok. Ol saveman i tok smok i kam long ol stov bilong paiawut o stov bilong ston kol i nogut tru wankain olsem posin i stap insait long ol sigaret smok na inap kilim man i dai.