ITALI em wanpela kantri i narapela kain, i gat ol longpela nambis i go inap long ol bikpela maunten, na long hap saut ples i hat tru na long hap not ples i kol tru. Na tu, Itali i gat planti volkeno, tasol sampela tasol i wok long pairap yet long nau olsem Stromboli na Maunten Etna.

Itali em wanpela kantri long Yurop we populesen bilong ol manmeri i planti tru. Planti man bilong ol narapela kantri i bin kam raun long Itali long lukim ples, olsem ol lain Arap, ol Bisantin, ol Grik, ol Noman, na ol Fonisia.

Dispela kantri i pulap tru long ol bilding na ol peinting samting bilong bipo. Ol haus bilong ol Grik na Rom bilong bipo em ol i bruk pinis, sampela hap bilong ol i sanap yet long ol taun na siti bilong Itali. Ol peinting, ol stetiu em ol i wokim long ston mabol, na ol wara faunten, em han mak bilong ol man olsem Bernini, Michelangelo, na Raphael.

Kaikai em bikpela samting long ol long olgeta de na planti kastam bilong ol em pasin bilong redim ol narapela narapela stail kaikai. Pasta em planti taim ol i save sevim na kaikai pastaim na bihain ol i kaikai mit o pis wantaim kumu sayor samting. Planti i save yusim oliv oil  bikos ol i save wokim planti oliv oil long Itali. Pitsa na risoto em ol kaikai tru bilong ol Itali em planti man i save laikim.

Ol Itali i gat nem long mekim pasin laikim, gutpela pasin pren, na amamas wantaim ol narapela. Ol i save amamas long stori wantaim ol narapela, olsem na em nomol long lukim ol i stori long ol pablik ples o taim ol i wokabaut ol i toktok, smail, na wokim han samting.

Planti manmeri long Itali i tok ol i bilong Misin Katolik, tasol liklik lain tasol i save go long lotu. Misin i no gat strong moa insait long ol yia i go pinis bikos planti man i no holimpas bilip ol i bin gat bipo yet long pasin bilong rausim bel na divos.

I gat planti Witnes Bilong Jehova long Itali. Ol i gat nem long skulim ol man long Baibel taim ol i mekim wok autim tok, na tu, ol i bihainim ol lo bilong Baibel. I gat winim 3,000 kongrigesen bilong ol Witnes Bilong Jehova long kantri olgeta, na planti bilong ol dispela kongrigesen i save autim tok long ol man i no mekim tokples Itali. I gat nid long skulim ol man bilong ol narapela tokples long Baibel, bikos insait long 10-pela yia i go pinis namba bilong ol man bilong ol narapela kantri i kam sindaun long Itali i go antap inap 3-pela taim.