Putim ol bikpela samting i go pas. “Skelim gut wanem ol samting i bikpela samting moa.” (Filipai 1:10) Wokim lista bilong ol samting yu laik mekim, tingim ol bikpela samting yu mas mekim na ol samting yu mas mekim hariap long taim stret, olsem em i bikpela samting long baim kaikai bilong apinun, tasol yu no mas mekim olsem hariap long wanpela taim stret. Na ating yu mas watsim feiveret TV program bilong yu long taim stret program i kirap, tasol ating dispela program i no bikpela samting. a

Plen gut pastaim. Saveman 10:10 i tok: “Sapos tamiok bilong man i no sap na em i no sapim, orait em bai i hatwok tru long katim diwai. Sapos man i gat gutpela tingting, bai em i mekim gutpela wok.” Yumi kisim wanem skul long dispela? Wankain olsem man i sapim tamiok, yu mas plen gut pastaim na bai yu ken yusim gut taim bilong yu. No ken mekim ol samting we inap pinisim nating bikpela haptaim na strong bilong yu. Sapos yu lukim olsem yu pinisim ol wok na yu gat sampela taim i stap yet, orait kirap mekim ol wok em yu tingting long mekim bihain. Taim yu plen gut long ol samting yu bai mekim, yu inap pinisim planti wok.

No ken mekim planti samting tumas. Lain long tok nogat long ol samting i no bikpela samting o ol i save kisim bikpela haptaim. Sapos yu mekim planti wok o pasim tok long mekim planti samting, dispela inap mekim yu taiet na inap pinisim amamas bilong yu.

Skruim taim na i no mekim hariap. “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.” (Saveman 11:4) Yumi kisim wanem skul long dispela? Pasin bilong skruim taim bilong mekim ol samting inap pinisim nating taim na i no kamapim wanpela gutpela samting. Wanpela fama husat i wetim gutpela taim, em bai i no inap planim kaikai o kisim kaikai i mau. Olsem tasol, ol hevi long i stap bilong yumi inap mekim na yumi no mekim ol disisen hariap. O ating yumi pilim olsem yumi mas wet inap long yumi kisim gut olgeta infomesen paslain long yumi mekim wanpela disisen. Em i tru olsem yumi mas tingting gut na skelim olgeta samting paslain long yumi mekim ol bikpela disisen. Sindaun 14:15 i tok: “Man i gat gutpela tingting, em i save was gut long ol pasin em i mekim.” Tasol tru tru yumi no save long wanem ol samting bai kamap long ol disisen yumi mekim.—Saveman 11:6.

No ken ting yu mas gutpela olgeta. Jems 3:17 i tok: “Savetingting i kam long heven [God] i mekim man i . . . bihainim pasin isi.” Em i gutpela olsem sampela taim yumi putim ol mak i antap! Tasol sapos yumi no winim ol dispela mak, dispela inap mekim yumi bel hevi. Olsem, sapos wanpela i lainim narapela tokples, em i mas save olsem em bai mekim ol popaia, tasol dispela bai helpim em long lain gut. Man i save ting olsem ol samting em i mekim i mas kamap gutpela tasol, em bai pret tru long mekim popaia long ol tok em i kolim, dispela pasin bai pasim em long lainim tokples. Mobeta yumi holim gutpela tingting long ol samting yumi ken mekim! Sindaun 11:2 i tok: “Ol man i gat gutpela tingting i save daunim ol yet.” Na tu, ol man i gat pasin daun na stretpela tingting, ol i no save siries tumas na planti taim ol i ken lap long ol yet.

Balensim wok na amamas. “Mobeta yumi gat liklik [malolo] samting tasol na yumi bel isi. Nogut yumi mekim planti wok oltaim, olsem man i ran i go bilong holimpas win.” (Saveman 4:6) Ol man i save tingting oltaim long wok tasol, ol i no save malolo na amamas long ol samting wok bilong ol i kamapim. Oltaim ol i taiet na bodi bilong ol i no gat strong. Baibel i kirapim yumi long holim stretpela tingting olsem: Wok strong na amamas long ol samting wok bilong yu i kamapim. Kain amamas olsem em “presen God i givim.”—Saveman 5:19.

Kisim gutpela slip. Wanpela man bilong raitim Baibel i tok: “Taim mi go long bet, wantu mi save slip i dai.” (Song 4:8) Olgeta manmeri i mas slip 8-pela aua long olgeta nait bilong kisim bek strong bilong ol long bodi, bel na tingting, na bai ol inap wokim gut tingting. Em i bikpela samting long kisim gutpela slip, bikos slip i save helpim wok bilong tingting na memori bilong yumi na helpim yumi long lain gut. Taim man i no kisim gutpela slip, dispela i mekim na i hatwok long em i lainim ol samting, em inap insait long ol eksiden, mekim ol popaia, na kros nating nating.

Putim ol mak yu inap winim. “Maski tingting oltaim long ol kain kain samting yumi laik kisim. . . . Mobeta yumi amamas long ol samting yumi kisim pinis.” (Saveman 6:9) Wanem poin bilong dispela tok? Man i gat savetingting i no save larim laik bilong em i kontrolim ol disisen em i mekim, na moa yet em ol laik we i hatwok long inapim. Na tu, em i no save larim ol edvetaismen na pasin bilong kisim ol dinau samting i pulim tingting bilong em. Em i save amamas long ol samting em i “kisim pinis.”

Skelim ol pasin bilong yu. Ol gutpela pasin bilong yu i helpim yu long luksave long ol samting i gutpela, na ol bikpela samting. Ol gutpela pasin bai stiaim laip bilong yu. Ol stretpela lo i helpim yu long putim ol bikpela samting long laip bilong yu i stap namba 1, na yu bai yusim gut taim bilong yu long olgeta wan wan aua na olgeta wan wan de. Yu inap kisim we ol dispela stretpela lo? Planti man i kisim save long ol dispela lo long Baibel, bikos ol i luksave olsem Baibel tasol i kamapim gutpela tingting na save.—Sindaun 2:6, 7.

Kisim pasin laikim tru. Kolosi 3:14 i tok: “Pasin laikim em i nambawan gutpela rot bilong mekim ol man i kamap wanbel.” Yumi no inap stap amamas tru na stap belgut sapos i no gat pasin laikim, na moa yet pasin laikim insait long famili. Ol man husat i sakim dispela tok na ol i putim pasin bilong kisim mani kago na biknem i stap namba 1, ol i no inap tru long stap amamas. Em as na Baibel i tok pasin laikim i winim olgeta narapela pasin, na Baibel i kolim dispela pasin planti handret taim.—1 Korin 13:1-3; 1 Jon 4:8.

Makim taim bilong kisim save long God. Wanpela man nem bilong em Geoff i gat meri na tupela pikinini, ol gutpela pren, na gutpela wok mani olsem wanpela nes. Wok bilong em i mekim na planti taim em i lukim ol man i karim pen na hevi na ol i dai. Em i tok: “Ol man i stap bilong karim pen na hevi tasol?” Wanpela taim em i ritim sampela nius em ol Witnes Bilong Jehova i bin wokim na em i kisim ol gutpela bekim.

Geoff i tokim meri na ol pikinini bilong em long ol samting em i bin lainim, na ol tu i gat laik long save. Famili i kirap stadi long Baibel na dispela i helpim i stap bilong ol na i helpim ol long yusim gut taim bilong ol. Na tu, dispela stadi bilong ol i helpim ol long bilip na wetim laip oltaim ol bai kisim bihain long graun we i no gat ol pen na hevi na laip i gat as bilong en.—Revelesen 21:3, 4.

Ekspiriens bilong Geoff i kirapim yumi long tingim tok bilong Jisas Krais, em i tok: “Ol man i hangre long kisim save long God, ol i ken amamas.” (Matyu 5:3) Yu redi long lusim sampela haptaim bilong kisim save long God? Tru tumas, haptaim yu lusim bilong mekim olsem bai givim yu savetingting bilong helpim yu long yusim gut olgeta wan wan de long laip olgeta bilong yu.