KLOSTU 500 yia i go pinis, ol man long Spen i go long kantri em nau ol i kolim El Salvado. Long dispela taim bipo, wanpela bikpela lain asples i kolim dispela hap olsem Cuscatlán​—mining bilong dispela nem em “Kantri Bilong Ston i Dia Tumas.” Long nau, planti manmeri bilong El Salvado ol i tumbuna bilong ol asples lain na ol man bilong Yurop em ol i bin kam sindaun long dispela hap.

Ol manmeri bilong El Salvado i gat nem olsem lain bilong wok strong na mekim pasin pren, na tu, ol i gat pasin bilong tingim ol narapela na pasin rispek. Paslain long ol i stat long toktok wantaim wanpela o taim ol i go insait long stua samting, ol i save tok gude, olsem “Buenos días” (gutpela moning) o “Buenas tardes” (gutpela apinun). Ol Salvado husat i stap long ol viles na long ol liklik taun, ol i ting sapos man i no tok gude long narapela man i wokabaut long rot, dispela em i pasin nogut.

Wanpela kaikai ol Salvado i save laikim tru em pupusa​—⁠em wanpela kain fletpela bret ol i wokim long kon o rais plaua, na ol i putim sis na bin, mit bilong pik, na ol narapela kaikai tu long en. Planti taim ol i save kaikai pupusa wantaim tomato sos na curtido​—em kaikai we ol i miksim kabis, karot, na anian wantaim viniga. Sampela manmeri i save yusim naip na fok taim ol i kaikai pupusa, tasol pasin  bilong ples em ol man i save holim pupusa long han na kaikai.

YU SAVE LONG DISPELA? Ol i kolim El Salvado olsem ples bilong ol volkeno. I gat winim 20 volkeno long dispela hap, na sampela i save pairap yet. Wara Los Tercios Waterfall i kapsait i go daun antap long ol longpela pos ston em volkeno i bin kamapim.

I gat winim 38,000 Witnes Bilong Jehova long El Salvado, na ol i stap long 700 kongrigesen. Ol i skulim inap 43,000 manmeri long tok bilong Baibel long tok Spen, Inglis, na tokples Sain Bilong Salvado.