“Man i kolim meri bilong em Iv, long wanem, em i tumbuna mama bilong olgeta manmeri.”—Stat 3:20.

OL SAVEMAN I TOK

Lain United Nations Educational, Scientific and Cultural Organization (UNESCO) i tok “olgeta manmeri i bilong wanpela lain tasol na i kam long wanpela tumbuna.”—Declaration on Race and Racial Prejudice, 1978.

BAIBEL I TOK

God i wokim man na meri, em Adam na Iv, na Em i tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Olsem na Adam na Iv i kamap papa na mama bilong olgeta manmeri. Bihain, taim bikpela tait i bagarapim klostu olgeta manmeri bilong graun, inap 8-pela manmeri tasol i abrusim bagarap—Noa na meri bilong em, na 3-pela pikinini man bilong tupela na ol meri bilong ol. Baibel i tok yumi olgeta i tumbuna pikinini bilong ol pikinini man bilong Noa.—Stat 9:18, 19.

“Long rot bilong wanpela man [God] i kamapim olgeta lain man bai ol i ken i stap long olgeta hap bilong graun.”—Aposel 17:26.

SAMPELA MAN I TOK

Inap sampela yia i go pinis, sampela lain man i kisim pasin bilong bel nogut long ol man bilong narapela lain o skin. Olsem, ol Natsi i tok ol jin bilong ol i mekim na ol i winim ol man bilong narapela lain o skin. Tasol dispela tokaut bilong lain UNESCO em yumi kamapim pinis, i tok olsem “olgeta lain man i wankain tasol bikos olgeta i kam long wanpela tumbuna.”

BAIBEL I TOK

Aposel 10:34, 35 i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” Long dispela as, i no gat man inap tok olsem ol man bilong wanpela lain o skin i winim narapela.

Jisas i kamapim tingting ol Kristen i mas holim taim em i tokim ol disaipel bilong em olsem: “Yupela olgeta i stap brata brata.” (Matyu 23:8) Em i prea olsem ol disaipel bilong em i mas i “stap wanpela tru,” na ol i no ken bruk bruk.—Jon 17:20-23; 1 Korin 1:10.

“Wanpela taim bai i kamap bihain na dispela maunten, haus bilong Bikpela i sanap long en . . . . Na olgeta lain manmeri bai i kam bung long en.”—Aisaia 2:2.

SAMPELA MAN I TING

Pasin bilong bel nogut yet long narapela lain na skin i mekim na long planti kantri ol man i tingting olsem, ol man bai winim dispela hevi o nogat. Sampela i ting olsem bai i no gat wanpela taim we olgeta lain na skin i stap wanbel.

BAIBEL I TOK

God bai i no inap larim ol man i birua long narapela lain na skin inap oltaim, nogat. Aninit long Kingdom bilong em, ol man na meri “bilong olgeta kantri na bilong olgeta lain na bilong olgeta lain pipol na bilong olgeta tokples,” bai lotuim em long pasin wanbel, na ol bai laikim tru narapela narapela. (Revelesen 7:9) Kingdom Bilong God i no wanpela samting i stap long bel bilong man, nogat. Em wanpela gavman we bai kamapim gutpela sindaun long dispela graun—em dispela ples we God i laik bai olgeta lain man i stap wanbel wantaim na i no gat pasin bilong bel nogut long narapela lain o skin. a