Lotu i bin mekim sampela samting long yu taim yu pikinini?

Yes. Mama bilong mi i bilong lotu Katolik. Tasol taim mi ritim stori bilong ol Pait Holi bilong lotu na Kot Bilong Misin, mi pilim olsem lotu i mekim pasin nogut na mi no gat laik long insait long wanpela lotu. Na tu, mi ritim ol stori bilong ol lotu i no Kristen na mi luksave olsem ol tu i no save bihainim stretpela pasin. Taim mi gat 14 krismas, mi lukim olsem lotu i save mekim pasin giaman na pasin i no stret, olsem na mi ting olsem i no gat God. Taim mi stap long skul ol i lainim mi long bilip bilong evolusen, olsem na mi bilip olsem olgeta samting i gat laip i kamap long laik bilong ol yet.

Wanem samting i kirapim yu long laikim saiens?

Taim mi gat 7-pela krismas, mi kisim wanpela maikroskop na dispela i kamap feiveret toi bilong mi. Mi yusim maikroskop long lukim ol binatang samting kain olsem ol bataflai, na tu, planti arapela samting.

Wanem samting i kirapim yu long kisim save long laip i kirap olsem wanem?

Taim mi gat 22 krismas, mi bungim wanpela Witnes Bilong Jehova, na em wanpela saientis. Em i bilip olsem God i wokim olgeta samting i gat laip. Mi hatwok long bilip long dispela tok. Mi ting mi inap long pruvim olsem bilip bilong em i no gat as bilong en. Tasol mi kirap nogut taim em i givim ol gutpela bekim long ol askim bilong mi. Olsem na mi laik kisim sampela save moa long ol man husat i bilip long God.

Sampela mun bihain, mi bungim narapela Witnes husat i gat bikpela save long sait bilong helt na ol marasin samting. Taim em i laik stori long bilip bilong em, mi orait long dispela bikos mi laik save long as na ol man i bilip long God. Mi laik  helpim em long lusim dispela tingting kranki bilong em.

Yu bin helpim em long save olsem bilip bilong em i no stret?

Nogat, mi no mekim olsem. Mi kirap mekim wok painimaut long hau laip i kirap. Na mi kirap nogut olsem sampela saientis i tok sampela sel i narakain tru olsem na ating ol i no bin kamap long graun. Sampela i ting olkain sel olsem i kam long narapela planet. Ol saientis i gat kain kain tingting long hau ol samting i gat laip i kamap.

I gat sampela samting ol i wanbel long en?

Planti saientis i wanbel olsem ol samting i no gat laip i kamapim ol samting i gat laip. Tasol mi tingting planti olsem, ‘Ol saientis i no save long hau ol samting i gat laip i kamap sapos i no gat Krieta, so hau na ol i save olsem laip i bin kamap long rot bilong ol samting i no gat laip?’ Mi kirap long skelim ol tok Baibel i mekim long ol samting i gat laip i kamap olsem wanem.

Yu gat wanem tingting long tok bilong Baibel?

Taim mi kisim sampela save moa long Baibel, dispela i helpim mi long save olsem ol tok bilong en i tru. Olsem, nau ol saientis i painimaut olsem yunives i gat kirap bilong en. Fes ves bilong Baibel em ol i bin raitim 3,500 yia i go pinis i tok, “Bipo bipo tru God i mekim kamap skai na graun na olgeta samting i stap long en.” a Na mi painimaut olsem olgeta tok Baibel i mekim long saiens i stret.

Save bilong yu long saiens i mekim na yu hatwok long bilip long God?

Nogat. Fes taim mi kirap bilip long God, em taim mi skul long saiens long yunivesiti inap 3-pela yia pinis. I kam inap long nau, taim mi lukim disain bilong ol samting i gat laip, dispela i strongim bilip bilong mi olsem i gat Krieta.

Yu inap stori long wanpela eksampel?

Mi save mekim wok painimaut long ol marasin na posin nogut i stap long ol samting i gat laip. Wanpela samting we i mekim mi i kirap nogut em hau ol samting i lukautim kru bilong yumi long ol samting nogut na ol baktiria. I gat wanpela samting i seperetim blut long ol sel bilong kru bilong yumi.

Wai na dispela em i narakain samting?

Inap wan handret yia i go pinis, ol saveman i luksave olsem olgeta samting i go insait long ol rop bilong blut i save go long olgeta hap bilong bodi, tasol i no go long kru na rop nev long bun bilong baksait. Mi kirap nogut long dispela, bikos i gat planti liklik rop bilong blut i save karim blut i go long olgeta sel bilong kru. Blut i save klinim, na givim kaikai na win long olgeta sel bilong kru. So hau na blut bilong yumi i stap seperet long ol sel bilong kru? Inap planti yia ol man i no save long dispela samting.

Wanem samting i seperetim blut na kru?

Ol liklik rop bilong blut i no wankain long ol plastik tiub. Wol bilong ol plastik tiub i save seperetim ol samting i stap insait long ol samting i stap ausait. Wankain tasol, wol bilong ol liklik rop bilong blut em ol sel. Na ol sel i save larim kain kain ol liklik samting long i go insait long ol na namel long ol rop bilong blut. Tasol ol sel i stap long ol rop bilong blut long kru bilong yumi i no wankain. Ol dispela sel i join gut long narapela narapela na em narakain samting tru. Ol i save stiaim gut wok bilong ol samting olsem oksijen, kabon daioksait, na suga bilong i go insait long blut na long kru. Tasol ol samting olsem ol protin na ol sel i no inap i go insait. Olsem na blut i stap seperet long kru na dispela i lukautim kru. Ol dispela kain gutpela disain i kamapim klia olsem ol samting i gat laip i no kamap long laik bilong ol yet.