Baibel i tok “kain kain trabel” i save painim ol manmeri. (Jop 14:1) Long nau, olgeta man i save karim hevi long kain kain rot. Tasol sampela manmeri i pilim olsem ol i no gat rot bilong pinisim bel hevi na kisim gutpela laip long bihain. Olsem wanem? Yu pilim olsem? Sapos olsem, orait yu ken bilip tru olsem Baibel i tokaut long gutpela samting bai kamap bihain—em gutpela samting we bai painim yu na olgeta lain man. Olsem:

• Baibel i skulim yumi olsem God Jehova i laik bai yumi gat gutpela sindaun.—Stat 1:28.

• God Jehova i tok promis olsem em bai mekim graun i kamap ples paradais.—Aisaia 65:21-25.

• Yumi ken bilip olsem dispela tok promis bai kamap tru. Revelesen 21:3, 4 i tok:

  “Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”

Dispela tok promis em i no wanpela tok nating, nogat. God Jehova i tingting pinis long inapim dispela tok promis, na em i gat strong na bikpela laik long mekim olsem. Yumi inap bilip tru long dispela tok promis bilong Baibel, na dispela tok promis i helpim yumi long “No ken tingting long suasaid.”

TINGIM DISPELA: Maski sapos tingting bilong yu i no stap isi wankain olsem bot em solwara i sakim i go i kam, tok bilong Baibel inap kamap olsem anka na helpim tingting bilong yu long stap isi.

SAMTING YU KEN MEKIM LONG NAU: Kisim save long tok Baibel i mekim long samting bai painim yumi long bihain. Ol Witnes Bilong Jehova bai amamas long helpim yu. Yu ken toktok wantaim ol long hap bilong yu o kisim sampela skultok taim yu lukim Web-sait www.pr418.com/tpi. a