FRAN PES STORI | NO KEN TINGTING LONG SUASAID
I Gat Helpim
“God i save wari long yupela, olsem na yupela i mas putim olgeta hevi bilong yupela long han bilong em.”—1 PITA 5:7.
Sapos yu pilim olsem i no gat rot bilong pinisim hevi bilong yu, ating yu bai tingting tasol long i dai. Tasol tingim sampela rot bilong kisim helpim.
Beten. Beten i no wanpela samting nating bilong stretim kwik tingting bilong man, nogat. Na tu, em i no laspela samting we man i mas mekim taim em i no gat rot moa long karim hevi. Beten i makim pasin bilong toktok wantaim God Jehova, em Man husat i tingim tru yu. Jehova i laik bai yu tokim em long olgeta wari bilong yu. Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.”—Song 55:22.
Ating i gutpela sapos long nau yu beten na toktok long God. Kolim nem bilong em, Jehova, na autim olgeta tingting i stap long bel bilong yu. (Song 62:8) Jehova i laik bai yu save long em olsem wanpela pren. (Aisaia 55:6; Jems 2:23) Beten em wanpela rot bilong toktok wantaim God, na yu inap beten long olgeta kain taim, na long olgeta kain hap.
Lain American Foundation for Suicide Prevention i tok, “oltaim ol wok painimaut i soim olsem planti manmeri husat i dai long rot bilong suasaid—winim 90 pesen—tingting bilong ol i no wok gut long taim ol i dai. Planti bilong ol i no luksave long dispela samting, na ol i no lukim dokta, na ol i no kisim marasin bilong helpim ol”
Ol lain husat i tingim yu. Ol narapela i tingim laip bilong yu—ating ol wanfamili na ol pren i soim olsem ol i tingim yu. Ating sampela lain husat i tingim yu em ol lain yu no bin bungim ol long bipo. Olsem, taim ol Witnes Bilong Jehova i mekim wok bilong ol long autim tok, ol i bin bungim sampela manmeri em hevi i daunim ol na ol i tokaut olsem ol i no gat rot bilong kisim helpim na ol i tingting long suasaid. Ol Witnes Bilong Jehova i save autim tok long ol haus na dispela i opim rot long ol inap helpim ol kain manmeri olsem. Ol Witnes Bilong Jehova i bihainim eksampel bilong Jisas long tingim olgeta manmeri. Na ol i tingim yu tu.—Jon 13:35.
Helpim i kam long ol saveman. Sapos man i tingting long suasaid, dispela i makim olsem em i bel hevi tru. Taim yu sik, yu no save sem long dispela, a? Olsem tasol, taim bel hevi i daunim yu, dispela em i no samting bilong sem long en. Ol saveman i kolim sik bilong bel hevi olsem “sik kus bilong tingting.” Olgeta kain man inap kisim dispela kain sik—na i gat rot bilong stretim dispela sik. a
TINGIM DISPELA: Sapos yu bel hevi tru, yu no inap pinisim dispela bel hevi long strong bilong yu yet. Sapos ol narapela i helpim yu, orait yu inap daunim bel hevi bilong yu.
SAMTING YU KEN MEKIM LONG NAU: Painim wanpela dokta husat inap helpim yu long daunim bel hevi.
a Sapos yu tingting strong long kilim yu yet, traim long painimaut ol rot bilong kisim helpim—ating i gat sampela oganaisesen we i helpim ol man long daunim tingting bilong suasaid, o sampela haus sik bilong helpim ol man em tingting bilong ol i paul. Ol wokman bilong ol dispela kain oganaisesen em ol lain husat i bin kisim trening long helpim ol narapela.
Ating Yu Bai Laikim Tu
KIRAP!
Stap Laip—Gutpela Samting Inap Kamap
Baibel inap helpim yu long tingim ol gutpela samting bai kamap bihain.
