FRAN PES STORI
No Ken Tingting Long Suasaid
SAPOS yu bungim Diana, a yu bai luksave olsem em wanpela savemeri, em i gat pasin pren, na em i save amamas long bung wantaim ol narapela. Maski i olsem, Diana i bel hevi tru na em i pilim olsem em i samting nating, na em i holim dispela tingting inap planti de, planti wik, na planti mun. Em i tok: “Olgeta de mi save tingting long dai. Mi tingting strong olsem graun bai stap gutpela ples sapos mi no stap laip.”
“Sampela wok painimaut i soim olsem long olgeta man husat i dai long rot bilong suasaid, 200 manmeri i traim long suasaid na 400 manmeri i bin tingting long suasaid.”—THE GAZETTE, MONTREAL, KANADA.
Diana i tok olsem em i no inap tru long kilim em yet i dai. Tasol, sampela taim em i pilim olsem i no gat as long em i stap laip. Em i tok: “Bikpela laik bilong mi em olsem, mi laik bai eksiden i kamap na mi dai. Mi no tingim dai olsem wanpela birua.”
Planti manmeri i pilim wankain olsem Diana, na sampela bilong ol i bin tingting long suasaid, na sampela i bin traim long suasaid. Ol saveman i tok, planti bilong ol man husat i traim long suasaid, i no olsem tru tru ol i laik kilim ol yet i dai, nogat; ol i laik pinisim tasol hevi bilong ol. Ol i bilip olsem i gat risen long ol i mas i dai; tasol tru tru ol i nidim risen bilong i stap laip.
Wai na yu no ken tingting long suasaid? Skelim 3-pela risen long stap laip.
a Mipela i senisim nem.
