PLANTI man i gat wankain hevi olsem Kari. Long Briten, wanpela lain bilong helpim ol man i gat sik long tingting i painimaut olsem, wanpela long 5-pela wokman long Briten i tok insait long ol yia ol i wok, presa i mekim na ol i sik, na tu, wanpela long 4-pela wokman long Briten i krai long ples wok bikos presa i daunim ol. Long 2009, i bin gat bikpela hevi bilong mani, olsem na namba bilong ol man i baim ol marasin bilong daunim presa i go antap tru.

Wanem samting i givim presa long yu?

• Bel i no stap isi

• Oltaim yu bisi

• Bel hevi long narapela

• Taim yu bungim bikpela hevi

Presa i mekim wanem samting long yu?

• Kisim kain kain sik

• Wari na tingting planti

• Yu no slip gut

• Kisim sik bilong bel hevi

• Yu lusim ol poroman

 Taim yu pilim presa, hariap tru bodi i mekim sampela samting bilong helpim yu long daunim presa. Bodi i save kamapim ol homon bilong helpim yu long pulim win hariap, klok i ken wok gut, na blut presa i ken go antap. Na tu, planti sel bilong blut na glukos i save go insait long ol rop bilong blut. Bodi i mekim olsem bilong helpim yu long daunim presa. Taim yu no pilim presa moa, bodi bai mekim nomol wok bilong en. Tasol taim yu pilim presa, bai yu tingting planti na bel i no stap isi, na dispela i wankain long kar i ron taim man i krungutim ekselereta. So em i bikpela samting long save long samting yu mas mekim bilong daunim presa bikos presa inap mekim sampela samting long bodi na tingting bilong yu.

Presa i no samting nogut. Lain American Psychological Association i tok: “Wankain olsem man i pilaim vailin, sapos em i pilaim isi ol string bilong vailin, em bai no kamapim gutpela musik. Na sapos em i pilaim ol string hat tumas, krai bilong vailin bai strong tumas o ol string inap bruk. Olsem tasol, presa inap kilim man i dai, tasol gutpela presa inap mekim man i amamas long ol wok bilong em. Bikpela samting em yu mas save long rot bilong daunim presa.”

Na tu, tingim olsem pasin na helt bilong ol man i no wankain. Olsem na wanpela samting inap givim presa long wanpela man, tasol long narapela nogat. Presa inap daunim yu sapos oltaim yu tingting planti long wok na dispela i mekim na yu no rileks, o yu no inap long stretim ol hevi i save kamap long wan wan de.

Bilong daunim presa sampela man i save dring alkohol, kisim drak, o smok. Ol narapela i kaikai planti o watsim TV o kompiuta, ol dispela pasin i no helpim man long daunim presa, nogat, em i putim bikpela presa long ol. Olsem wanem yumi inap save long rot bilong daunim presa?

Planti man i daunim presa bilong laip taim ol i bihainim ol gutpela stiatok bilong Baibel. Yu ting ol gutpela stiatok bilong Baibel inap helpim yu? Bilong kisim bekim, yumi ken skelim 4-pela samting i givim presa long ol man.

 1 BEL I NO STAP ISI

I no gat wanpela man inap abrusim hevi. Baibel i tok, “taim nogut i save painim yumi olgeta.” (Saveman 9:11) Olsem wanem yu inap daunim pasin bilong bel i no stap isi? Traim mekim ol dispela samting.

• Kamapim tingting bilong yu long wanpela wanblut o pren em yu trastim. Ol ripot i soim olsem taim wanpela gutpela pren o famili i sapotim yu, planti taim dispela i lukautim yu long ol sik bilong presa. Tru tumas, “ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”—Sindaun 17:17.

• No ken tingting tasol long ol samting nogut bai kamap. Taim yu kisim kain tingting olsem, dispela bai bagarapim filings bilong yu. Na ating samting yu pret long en i no inap kamap! Olsem na Baibel i tok: “No ken tingting planti long ol samting bilong de antap, long wanem, de antap bai i gat ol wari bilong en.”—Matyu 6:34.

• Bilip long strong bilong beten. Long 1 Pita 5:7, em i tok: “God i save wari long yupela, olsem na yupela i mas putim olgeta hevi bilong yupela long han bilong em.” God i soim olsem em i tingim yumi long rot bilong givim yumi bel isi na em i promis olsem em i ‘no inap tru givim baksait’ long ol man husat i askim em long givim bel isi long ol na helpim ol long taim bilong hevi.—Hibru 13:5; Filipai 4:6, 7.

2 OLTAIM YU BISI

Taim yu bisi long wok, go long skul, o lukautim ol pikinini na ol lapun papamama, dispela inap givim presa long yu. Tasol ating em ol samting yu mas mekim. (1 Timoti 5:8) Olsem na yu mas mekim wanem bilong daunim presa?

• Makim taim bilong rileks na kisim gutpela malolo. Baibel i tok: “Mobeta yumi gat liklik samting tasol na yumi bel isi. Nogut yumi mekim planti wok oltaim, olsem man i ran i go bilong holimpas win.”—Saveman 4:6.

• Putim ol bikpela samting i stap namba wan na no ken tingting long kisim planti samting. (Filipai 1:10) Olsem, abrusim pasin bilong baim planti samting o lusim bikpela haptaim long wok.—Luk 21:34, 35.

Kari em yumi bin stori pinis long em i skelim gen sindaun bilong em. Em i tok: “Mi luksave olsem mi wok long tingim laik bilong mi yet tasol.” Em i salim bisnis bilong en na kisim wok we em inap lusim sampela haptaim moa long stap wantaim famili bilong em. Em i tok moa: “Maski sindaun bilong mipela i no gutpela tumas olsem pastaim, mi na meri bilong mi i no pilim presa moa, na mipela i gat bikpela haptaim long stap wantaim ol famili na pren bilong mipela. Nau mi stap bel isi na mi no tingting long mekim wok bisnis.”

 3 BEL HEVI LONG NARAPELA

Taim yu bel hevi long ol narapela, moa yet long ples wok, dispela inap givim presa long yu. Sapos yu ekspiriensim dispela, i gat sampela samting yu inap mekim bilong helpim yu.

• Sapos wanpela i mekim yu bel hevi, no ken belhat na kros hariap. Sindaun 15:1 i tok: “Sapos man i belhat long yu, orait bekim tok isi long em, na bai belhat bilong en i dai. Tasol sapos yu rabisim narapela man long tok bilong yu, bai yu mekim em i belhat nogut tru long yu.”

• Stretim hevi long taim yutupela yet i stap na mekim long pasin rispek, long dispela rot yu givim biknem long em.—Matyu 5:23-25.

• Kliagut long tingting na filings bilong narapela. Dispela pasin i mekim na yumi “no inap kros kwik,” bikos yumi tingim filings bilong em. (Sindaun 19:11) Taim yumi mekim olsem dispela i helpim yumi long luksave long pasin bilong yumi yet.

• Fogivim narapela. Pasin bilong fogivim narapela em gutpela pasin, na tu, dispela bai helpim yu. Olsem wanpela ripot long 2011 i tok, ol man husat “i no save fogivim” narapela ol i kisim hai blut presa na sik bilong klok, tasol ol man husat i save fogivim narapela, presa i no daunim ol.—Kolosi 3:13.

4 TAIM YU BUNGIM BIKPELA HEVI

Nieng, husat i stap long Kambodia i karim planti hevi tru. Long 1974, em i kisim bagarap long bodi taim wanpela bom i pairap long ples balus. Long yia bihain, 2-pela pikinini bilong em, mama bilong em, na man bilong em i dai. Long yia 2000, paia i kukim haus bilong em na em i lusim olgeta samting bilong em. Tripela yia bihain, namba 2 man bilong em i dai. Olgeta dispela samting i mekim na em i laik kilim em yet i dai.

Maski ol dispela samting i kamap, Nieng i painim rot long karim hevi bilong em. Olsem Kari, em i stadi long Baibel na save em i kisim i helpim em, olsem na em i lusim bikpela haptaim long helpim ol narapela long kisim wankain save. Stori bilong em i sapotim wok painimaut ol saveman bilong Briten i mekim long 2008. Ol i painimaut olsem wanpela samting bilong helpim ol man long “strongim bel maski ol i pilim presa,” em ol i mas “givim taim na strong samting . . . long helpim ol narapela.” Dispela edvais i stap long Baibel inap longtaim tru.—Aposel 20:35.

Na tu, Nieng i bilip na wet long gutpela samting bai kamap bihain, em taim olgeta hevi bilong ol man bai pinis. Long bihain, “stretpela pasin tasol” bai stap long olgeta hap bilong graun.—Song 72:7, 8.

I gat planti hevi long nau i putim presa long yumi, tasol long rot bilong Baibel yumi inap kisim gutpela savetingting na yumi inap bilip na wetim ol gutpela samting bai kamap bihain. Planti milion manmeri i kisim helpim long dispela nambawan gutpela buk i winim olgeta narapela buk. Na dispela buk inap helpim yu tu.