Gutpela Tingting i Wok Long Singaut—Yu Inap Harim?
“Gutpela na stretpela tingting i olsem wanpela meri i sanap na singautim yumi. Em i sanap long ples maunten klostu long rot na long ol rot bung. Na em i sanap klostu long ol dua . . . na i wok long singaut.”—SINDAUN 8:1-3.
EM I bikpela samting long gat gutpela tingting. Man i no gat gutpela tingting, oltaim em i save popaia. Tasol yumi inap painim we gutpela tingting? Man bilong raitim Buk Sindaun i luksave olsem Krieta bilong yumi i gat bikpela save na gutpela tingting. Na tu, olgeta manmeri inap kisim save long gutpela save na tingting bilong God long wanpela gutpela buk, em Baibel. Skelim ol dispela samting:
Buk The World Book Encyclopedia i tok Baibel em “wanpela buk ol man i tilim long olgeta hap bilong graun winim olgeta narapela buk. Ol man i tanim tok bilong Baibel planti taim na long planti tokples winim olgeta narapela buk.” Long nau, ol man inap ritim Baibel olgeta o ol hap bilong en long klostu 2,600 tokples, olsem na winim 90 pesen bilong olgeta man long graun inap ritim Baibel.
Na tu, gutpela tingting i “wok long singaut.” Yumi ritim tok bilong Matyu 24:14, em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis [bilong ol samting bilong dispela graun] bai kamap.”
Dispela “gutnius” em savetingting bikos em i kamapim gutpela samting em God i tingting pinis long mekim bilong pinisim ol hevi bilong yumi long rot bilong Kingdom bilong em. Dispela Kingdom em wanpela gavman God i kamapim na em bai bosim graun olgeta, na bai i gat wanpela lain manmeri na wanpela gavman. (Daniel 2:44; 7:13, 14) Olsem na Krais Jisas i beten olsem: “Kingdom bilong yu i mas i kam. Laik bilong yu i mas kamap long graun olsem em i save kamap long heven.”—Matyu 6:9, 10.
Ol Witnes Bilong Jehova i givim bel tru long tokaut long Kingdom Bilong God long 239 kantri! Tru tumas, gutpela tingting i “wok long singaut,” na tu, em i singaut “klostu long ol dua.” Yu inap harim?
