Planti taim ol nius ripot i stori olsem Intenet em hap we ol man i save mekim pasin sem, stilim infomesen, na mekim pasin buli long ol narapela. I gat gutpela risen long yu tingting planti: Ol tineja i save yusim Intenet olgeta taim, na ol i no save long ol samting nogut bilong en.

Yu inap skulim tineja long pasin bilong yusim gut Intenet. Tasol paslain, yu mas save long sampela samting i save kamap long Intenet.

Ol tineja i ken yusim Intenet long ol mobail fon samting. Em i savetingting long putim kompiuta long hap we ol narapela inap lukim. Tasol sapos tineja i gat smatfon o kompiuta samting olsem teblet na i gat Intenet long en, em inap yusim Intenet long kain kain taim na ples, na tu, long taim yu no stap.

Sampela tineja i save lusim bikpela haptaim long yusim Intenet. Wanpela gel i gat 19 krismas i tok: “Mi save onim kompiuta long ritim E-meil inap 5-pela minit, tasol mi save lusim planti aua long watsim ol vidio. Mi mas kisim pasin bilong bosim gut bel.”

Ol tineja inap serim planti infomesen bilong ol. Ol man nogut inap ritim ol tok na lukim ol poto bilong tineja long Intenet long kisim save long hap em i stap long en, skul em i go long en, na wanem taim em yet i save stap long haus.

Sampela tineja i no save long samting nogut i save kamap long ol tok o poto ol i putim long Intenet. Samting yu putim long Intenet, em bai stap long Intenet. Sampela taim ol poto o ol tok yu raitim inap semim yu sapos ol narapela i lukim. Olsem, wanpela kampani inap sekim Intenet bilong kisim sampela save moa long yu paslain long ol i singautim yu long wok.

Maski ol dispela samting i save kamap, tingim olsem: Intenet i no birua bilong yu. Hevi i save kamap taim man i no yusim gut Intenet.

Helpim tineja long yusim gut taim na putim ol bikpela samting i stap namba 1. Man i bikpela pinis na i save mekim gut ol wok, pastaim em i mas lain long putim ol bikpela samting i stap namba 1 long laip bilong em. Pasin bilong toktok gut wantaim famili, mekim ol homwok, na ol wok bilong haus em ol bikpela samting moa winim pasin bilong yusim Intenet. Sapos tineja i lusim bikpela haptaim long Intenet, orait putim sampela lo, olsem makim hamas aua em i ken yusim Intenet.—Stiatok bilong Baibel: Filipai 1:10.

Skulim tineja long tingting gut paslain long em i raitim ol tok o putim poto long Intenet. Helpim tineja long tingim ol askim olsem: Tok mi raitim bai bagarapim bel bilong narapela? Dispela poto bai bagarapim gutnem bilong mi? Mi bai pilim olsem wanem sapos papamama bilong mi o ol narapela i lukim dispela tok o poto? Na sapos ol i lukim, ol bai gat wanem tingting long mi? Mi bai gat wanem tingting long man husat i putim kain tok o piksa olsem?—Stiatok bilong Baibel: Sindaun 10:23.

Helpim tineja long bihainim ol stretpela pasin, na i no ol lo tasol. Yu no inap lukim olgeta samting tineja i mekim. Na tu, olsem papa o mama, i no olsem yu mas kontrolim pikinini, nogat, yu laik helpim ol long “skelim ol samting na long dispela rot ol i lainim gut tingting bilong ol long kliagut long wanem samting i stret na wanem samting i no stret.” (Hibru 5:14) Olsem na abrusim pasin bilong putim tasol ol lo na panisim pikinini, traim long helpim em long wokim tingting na em i ken bihainim stretpela pasin. Pikinini bilong yu i laik ol narapela i tingim em olsem wanem kain man o meri? Em i laik ol narapela i mas tingim wanem ol pasin bilong em? Namba 1 samting em yu laik helpim tineja long mekim ol gutpela disisen, maski yu stap wantaim em o nogat.—Stiatok bilong Baibel: Sindaun 3:21.

Pasin bilong yusim Intenet i wankain long pasin bilong draivim kar—yu mas skelim gut ol samting. Olsem na ol papamama i gat bikpela wok long helpim pikinini long wokim ol gutpela disisen. Olsem saveman bilong yusim gut Intenet, Parry Aftab, i tok: “Ol pikinini i gat bikpela save long teknoloji, tasol ol papamama i gat bikpela save moa long ol samting bilong laip.”