“Bai mi tingting long olgeta samting yu bin mekim. Yu bin mekim ol strongpela wok, na bai mi tingim dispela tu.”—Song 77:12.

OL MAN I TOK

I gat narapela narapela pasin bilong tingim tingim ol samting, sampela bilong ol dispela pasin i kam long ol lotu bilong Esia long bipo. Wanpela man bilong raitim buk i tok: “Yu mas rausim olgeta samting i stap long tingting na bai yu inap tingim gut ol samting.” Dispela tok i soim olsem taim man i ritim ol tok o lukim ol piksa na i rausim olgeta samting long tingting, dispela bai helpim em long wokim gut tingting na bel i stap isi.

BAIBEL I TOK

Em i bikpela samting long kisim pasin bilong tingim tingim long bel. (1 Timoti 4:15) Dispela pasin em Baibel i stori long en i no makim olsem man i mas rausim olgeta samting long tingting o kolim wanpela hap tok planti taim. Pasin bilong tingim tingim ol tok bilong Baibel i makim olsem yu inap tingim ol bikpela tok bilong en, olsem ol pasin bilong God, ol lo na ol samting em i bin wokim. Wanpela bilipman i tok: “Mi tingting long ol samting yu bin mekim na long ol gutpela wok bilong yu.” (Song 143:5) Na tu, em i tok: “Taim mi slip long bet mi save tingting long yu. Long nait mi save tingting long yu tasol.”—Song 63:6.

“Stretpela man i save tingting gut pastaim, na bihain em i bekim tok long arapela man.”—Sindaun 15:28.

BAIBEL I TOK

Taim yumi tingim tingim ol gutpela samting dispela i helpim yumi long kamap gutpela man, yumi bosim gut bel na strong long bihainim ol stretpela pasin. (Sindaun 16:23) Pasin bilong tingim ol kain samting olsem inap helpim yumi stap amamas na yumi pilim olsem laip i gat as bilong en. Man i tingim tingim God long olgeta taim, em i stap olsem man em Song 1:3 i stori long en. Em i tok: “Dispela man i olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.”

Na tu, pasin bilong tingim tingim ol samting inap helpim yumi long gat gutpela memori na wokim gut tingting. Olsem, taim yumi stadim ol samting God i bin wokim o wanpela stori bilong Baibel, yumi inap kisim planti save. Tasol taim yumi tingim tingim ol dispela samting, yumi luksave long hau ol dispela tok i stret long ol narapela tok, na ol samting i kamap bipo i givim wanem skul long yumi. Olsem wanpela kapenta i yusim ol diwai samting bilong wokim wanpela bilding, pasin bilong tingim tingim ol samting bai helpim yumi long wokim gut tingting.

“Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?”—Jeremaia 17:9.

BAIBEL I TOK

“Ol tingting nogut i kamap insait long bel bilong man na i kam ausait, dispela i save kamapim ol pasin olsem: pasin pamuk, stil, kilim man i dai, pasin adaltri, pasin gridi, pasin nogut, giaman, pasin bikhet na i no sem, aigris . . . na longlong pasin.” (Mak 7:21, 22) Pasin bilong tingim tingim ol samting i olsem wanpela paia, olsem na yumi mas bosim gut tingting bilong yumi! Nogut ol tingting kranki i kirapim ol laik nogut na yumi mekim ol pasin i no stret.—Jems 1:14, 15.

Olsem na Baibel i kirapim yumi long tingim ‘ol samting i tru, ol bikpela samting, ol samting i stretpela, ol samting i klin, ol samting i kirapim pasin laikim, ol samting i gat gutnem, ol samting i gutpela, na ol samting i stret long ol man i litimapim.’ (Filipai 4:8, 9; futnot) Taim yumi tingim tingim ol kain gutpela samting, yumi inap kamapim ol gutpela pasin, mekim ol gutpela tok na pas gut wantaim ol narapela.—Kolosi 4:6.