Long Fraide, Mas 11, 2011, wanpela bikpela guria em strong bilong en inap long 9.0 i kamap long Japan na i kilim i dai winim 15,000 manmeri. Dispela em wanpela bikpela disasta tru, olsem na gavman i lusim olsem 200 bilion dola bilong Amerika long stretim bek ol samting i bagarap. Taim ol i toksave olsem sunami bai kamap, Kei, em man i gat 32 krismas i ranawe i go long ol ples maunten. Em i tok: “Long neks moning, mi go long haus bilong kisim sampela samting, tasol wara i kisim haus na olgeta samting i go pinis. Ol pos bilong haus tasol i stap.

“Long dispela taim, i hatwok long bilip olsem olgeta samting bilong mi i lus, olsem kar bilong mi, kompiuta mi yusim long mekim ol wok, ol tebol, ol sia, piano, gita, ukalele na flut. Na tu, ol peint samting, na ol tul bilong mi long droim na peintim ol piksa, olgeta i bagarap.”

Tingim ol samting yu gat, no ken tingim tumas ol samting yu lusim. Baibel i tok: “Maski man i gat planti samting, em i no kisim laip long ol dispela samting em i holim.” (Luk 12:15) Kei i tingim olgeta samting i kamap na em i tok: “Pastaim mi raitim lista long ol samting mi mas kisim, tasol dispela i mekim na mi tingim ol samting i lus pinis. Olsem na mi raitim tu long lista ol samting mi nidim, na taim mi kisim pinis ol dispela samting, mi save makim long lista. Dispela lista i helpim mi long amamas long ol samting mi gat na mi no tingim ol samting i bagarap.”

No ken tingim tumas hevi bilong yu. Lusim sampela haptaim long stori long ol narapela long ol samting i bin helpim yu. Kei i tok: “Mi kisim helpim long ol pren bilong mi na long ol man i volantia long helpim ol arapela long taim bilong disasta. Ol i helpim mi na mi pilim olsem mi no inap long lukautim mi yet. Tasol mi tingim tok bilong Baibel long Aposel 20:35, em i tok: ‘Amamas bilong givim samting i winim amamas bilong kisim samting.’ Mi no gat planti samting long givim long ol narapela, tasol mi mekim ol tok bilong strongim bel bilong ol man husat i lusim famili, haus na mani kago samting bilong ol long dispela disasta. Taim mi helpim ol narapela, dispela i mekim isi bel bilong mi.”

Beten long God i ken givim savetingting long yu na bai yu inap karim hevi bilong yu. Kei i bilip long tok bilong Baibel olsem God i save “harim beten bilong ol manmeri” i nidim helpim. (Song 102:17) Olsem na yu tu inap mekim wankain samting na beten long God i ken strongim yu.

Yu save long dispela? Baibel i tok profet long wanpela taim bai kamap we ol man bai i no bel hevi olsem famili o haus na mani kago samting bilong ol i lus long ol disasta. a—Aisaia 65:21-23.