Ronaldo long Brasil i bin insait long wanpela kar eksiden we i kilim i dai papa na mama, tupela brata, na anti bilong em. Em i tok: “Mi stap long haus sik na bihain long tupela mun ol dokta i tokim mi olsem famili bilong mi i dai.

“Pastaim i hatwok long mi ekseptim olsem famili bilong mi i no stap moa. Mi tingting, wai na olgeta i dai? Mi wari na bel hevi tru. Mi pilim olsem i nogat as long mi stap laip. Mi krai long olgeta de inap planti mun! Mi pilim olsem em asua bilong mi long larim narapela man i draivim kar. Mi tingting olsem sapos mi bin draiv, dispela eksiden bai i no kamap.

“Nau em 16 yia i go pinis, na mi inap mekim ol samting em mi save mekim bipo. Mi bel hevi yet olsem famili bilong mi i dai, dispela em samting mi no inap lusim tingting long en.”

Krai sori long ol man yu laikim em ol i dai. Baibel i tok, i gat “taim bilong krai.” (Saveman 3:1, 4) Ronaldo i tok: “Taim mi bel hevi, mi save krai. Bihain long mi krai, bel bilong mi i stap isi.” Ol man i gat narapela narapela pasin bilong krai sori. Olsem na sapos i hatwok long soim olsem yu bel hevi, dispela i no makim olsem yu haitim filings bilong yu o yu mas fosim yu yet long krai.

No ken stap wanpis. (Sindaun 18:1) Ronaldo i tok: “Mi bung wantaim ol narapela na mi no stap wanpis. Mi save amamas taim ol narapela i kam visitim mi. Na tu, mi kamapim tingting bilong mi long meri bilong mi na ol gutpela pren.”

No ken kros hariap sapos wanpela i mekim ol tok i bagarapim bel bilong yu. Ating ol bai tok olsem, “Nau famili bilong yu i stap gut.” Ronaldo i tok: “Ol man i mekim sampela tok bilong mekim isi bel bilong mi, tasol ol dispela tok i bagarapim bel bilong mi.” Sapos dispela i kamap long yu, no ken tingim ol dispela tok, bihainim gutpela stiatok bilong Baibel olsem: “No ken harim olgeta toktok bilong ol manmeri.”—Saveman 7:21.

Kisim save long tok i tru long samting i painim ol man i dai. Ronaldo i tok: “Long Saveman 9:4, 5, Baibel i tok ol man i dai pinis ol i no karim pen na hevi, na dispela i mekim gut bel bilong mi. Baibel i stori tu olsem ol man i dai pinis ol bai kirap bek. Olsem na mi tingim famili na ol pren bilong mi em ol i dai, i olsem ol i go long wanpela holide.”—Aposel 24:15

Yu save long dispela? Baibel i tok promis olsem bai i gat taim we God “bai i pinisim dai tru na bai dai i no kamap moa.” a—Aisaia 25:8.