YU TING WANPELA I BIN WOKIM?

Pasin Bilong Gastric Brooding Frog Long Karim Pikinini

PLEI

Pasin Bilong Gastric Brooding Frog Long Karim Pikinini

OL MAN i ting stat long 2002, olgeta gastric brooding frog bilong Australia i no stap moa. Ol dispela rokrok i gat narapela kain pasin long karim pikinini. Meri rokrok i save daunim ol kiau bilong en na lukautim insait long bel inap olsem 6-pela wik. Bihain ol kiau i bruk na ol pikinini rokrok i kam ausait long maus bilong en.

Bilong lukautim ol dispela kiau, dispela rokrok i no inap kaikai, na tu, em i no save kamapim win insait long bel. Ol saveman i painimaut olsem ol dispela kiau i kamapim wanpela marasin we i pasim bel long kamapim win.

Dispela meri rokrok inap karim olsem 24 kiau. Taim ol dispela kiau i bruk, hevi bilong ol pikinini rokrok em 40 pesen long hevi bilong bodi bilong en. Em wankain long meri em hevi long bodi bilong em i 68 kilogram na em i karim 24 pikinini. Na hevi bilong bodi bilong wan wan pikinini em 1.8 kilogram! Ol pikinini insait long bel bilong wanpela meri rokrok inap mekim bel bilong en i go bikpela na i pasim waitlewa bilong em na i hatwok long em i pulim win. Olsem na em i mas pulim win long skin bilong em.

Insait long sampela de gastric brooding frog i save karim ol pikinini. Sapos em i luksave olsem i gat birua i stap klostu, kwiktaim em bai trautim ol pikinini i kam ausait. Ol saveman i bin lukim wanpela meri gastric brooding frog i trautim 6-pela pikinini rokrok long seim taim. Em i trautim ol i go longwe inap olsem 1 mita samting.

Sampela saveman i ting olsem insait long sampela haptaim gastric brooding frog i senisim pasin bilong en long karim pikinini. Sapos i olsem, dispela rokrok i mas senisim bodi bilong en na ol pasin bilong en tu. Tasol saientis Michael J. Tyler i tok: “I hatwok long ting olsem dispela rokrok inap mekim kain senis olsem insait long sampela haptaim. I nogat narapela rot long em i karim pikinini, long wanem, dispela em pasin bilong en.” Sampela man i tok dispela rokrok i no kamap nating na i senis senis insait long sampela haptaim, olsem na i mas i gat Man i bin wokim. a

Yu ting wanem? Pasin bilong gastric brooding frog long karim pikinini i kamap long rot bilong evolusen? O wanpela i bin wokim?

a Long buk bilong Charles Darwin, Origin of Species, em i tok: “Sapos ol samting i kamap long laik bilong ol yet, i mas i gat sampela haptaim bilong ol i ken mekim ol liklik liklik senis, na i no olsem ol senis i . . . kamap wantu tasol.”