“Yupela i lusim tok bilong God na yupela i holim strong ol kastam bilong ol man.”—Mak 7:8.

BAIBEL I TOK

Olgeta manmeri i gat laik long “kisim save long God,” na ol i inapim dispela laik taim ol i lotuim God. (Matyu 5:3) Olsem na ol man i kamapim planti lotu em ol man yet i as bilong ol bilip bilong en, na God i no as bilong ol dispela bilip.

Olsem, Baibel i stori long lain bilong wanpela lotu long taim bilong ol aposel olsem: “Ol i save givim bel tru long mekim wok bilong God, tasol ol i no gat stretpela save na ol i mekim olsem. Ol i no bin daun long stretpela pasin bilong God, long wanem, ol i no save long stretpela pasin bilong em, nogat. Long strong bilong ol yet ol i laik kamapim klia olsem ol i stretpela man.” (Rom 10:2, 3) Long nau tu, planti lotu i skulim ol man long “ol tok bilong man tasol.”—Mak 7:7.

“Yumi wan wan i mas tingim ol arapela namel long yumi, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim.” —Hibru 10:24, 25.

BAIBEL I TOK

Long Hibru 10:25, Baibel i tok, “no ken lusim pasin bilong bung wantaim.” Dispela tok i kamapim klia olsem God i laik ol manmeri i mas bung wantaim bilong mekim lotu. Tasol i stret ol man bilong lotu i kamapim tingting bilong ol yet long God na ol samting em i laik bai ol man i mas mekim? Nogat. Baibel i tok long ol man i lotu long God long pasin em i orait long en, ol i mas “wanbel long ol toktok” ol i mekim na “wanbel tru long holim wankain tingting na wankain laik.” (1 Korin 1:10) Ol i mas bung long ol kongrigesen na ol i mas “laikim tru olgeta wanbilip” bilong ol long olgeta hap bilong graun. (1 Pita 2:17; 1 Korin 11:16) God i amamas long kain pasin bilong bung na lotu long em.

“Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:35.

BAIBEL I TOK

Baibel i tok piksa long ol lain husat i lotu tru olsem: “Kaikai ol i kamapim bai helpim yupela long luksave long ol. Ol man i no save kisim ol greip long ol rop i gat nil na ol fik long ol gras nogut, a?” (Matyu 7:16) I no olsem yu mas kamap wanpela saveman bilong skelim ol plaua na bai yu luksave long wanpela diwai fik i narapela kain long gras nogut, nogat. Olsem tasol, i no olsem yu mas kamap wanpela saveman bilong lotu na bai yu save long lotu i tru. Wanem samting bai helpim yu long luksave long lotu i tru?

• Lotu i tru i save skulim ol man long Tok Bilong God, em Baibel. (Jon 4:24; 17:17) Ol man i no as bilong ol tok bilong en.

• Lotu i tru i helpim ol man long save long God, na tu, save long nem bilong en, em Jehova.—Jon 17:3, 6.

• Lotu i tru i bilip olsem Kingdom Bilong God bai helpim ol man, na i no ol gavman bilong ol man.—Matyu 10:7; 24:14.

• Lotu i tru i save kirapim ol man long mekim pasin laikim. (Jon 13:35) Na tu, skulim ol man long rispektim ol man bilong narapela lain, yusim taim na ol strong bilong ol long helpim narapela, na skulim ol man long no ken insait long ol pait bilong ol kantri.—Maika 4:1-4.

• Lotu i tru i save bosim olgeta samting man i mekim, olsem pasin na wokabaut bilong em. Ol manmeri bilong lotu i tru i save bihainim ol tok ol i skulim ol man long en.—Rom 2:21; 1 Jon 3:18.

Ol Witnes Bilong Jehova, em ol lain i wokim dispela nius, ol i save wok strong long givim biknem long God long toktok na pasin bilong ol. Mipela i laik singautim yu long go long wanpela miting bilong ol long Haus Kingdom na yu inap luksave long dispela.