Lain Department of Agriculture i painimaut olsem insait long sampela haptaim long yia 2012, inap olsem 49 milion manmeri long Amerika “i sot long kaikai o ol i no inap long painim kaikai bilong lukautim famili bilong ol.”

Wanpela stadi long ol yunivesiti sumatin i kamapim olsem 56 pesen bilong ol meri na 41 pesen bilong ol man i tokaut olsem ol i save dring planti. Dispela stadi i stori moa olsem, dispela i makim olsem insait long wanpela taim, ol man i dring 8-pela botol bia na ol meri i dring 6-pela botol bia.

Ol saientis i kisim hap graun long Mariana Trench, em wanpela bikpela baret i go daun inap olsem 11,000 mita insait long solwara. Ol i painimaut olsem i gat baktiria na ol liklik binatang samting i stap, maski i nogat san lait, presa bilong wara i strong, na wara i kol tru. Pastaim ol saientis i ting ol samting i gat laip i no inap stap long kain ples olsem.

Bilong helpim ol man na ol i no ken pat tumas, gavman bilong Dubai i tokaut long givim 45 dola bilong Amerika long ol man husat i lusim 1 kilogram hevi bilong bodi bilong ol. Bilong kisim dispela mani, ol man i mas rejistaim nem na ol i mas lusim 2 kilogram hevi bilong bodi bilong ol long mun Ramadan.