Yu toktok wantaim wanpela pren na teks mesis i kam long fon. Bai yu mekim wanem?

1. Toktok long pren bilong yu na long seim taim ritim teks mesis.

2. Tok eskius long pren bilong yu na ritim teks mesis.

3. Toktok long pren bilong yu na yu no ritim teks mesis.

Yu ting bekim yu makim em bikpela samting? Yumi ken tok yes!

Pasin bilong salim teks mesis na long seim taim yu toktok wantaim wanpela pren, dispela i wankain olsem yu pilaim wanpela feiveret gem bilong yu, tasol yu no bihainim ol lo bilong en. Ating bai yu tok, ‘Tasol em ol pren bilong mi.’ Em bikpela samting long soim gutpela pasin taim yu stap wantaim ol pren bilong yu. Dispela i no makim olsem yu mas strik tru, nogat. Tingim dispela: Sapos yu no mekim gutpela pasin taim yu stap wantaim ol pren bilong yu, ol bai i no laik pren moa wantaim yu.

Bilong wanem yumi tok olsem? Bikos ol man i laik bai ol narapela i mas mekim gutpela pasin long ol. Wanpela yangpela meri, Beth a i tok: “Mi no save amamas taim mi toktok long wanpela pren na em i wok long sekim fon bilong em, i kain olsem em i no laik harim tok bilong mi!” Yu ting Beth bai amamas long gat kain pren olsem?

Yumi ken skelim gen ol bekim i stap aninit long het tok “Hatwok Bilong En.” Bai yu makim wanem bekim? Ating bai yu luksave olsem Bekim A i no kamapim gutpela pasin. Olsem wanem long Bekim B na C? Yu ting em gutpela pasin long tok eskius long pren bilong yu na ritim teks mesis? O yu ting i gutpela long toktok wantaim pren bilong yu na yu no ritim teks mesis?

I no gat wanpela bilong ol dispela 3-pela bekim i stret. Tasol Baibel inap helpim yumi long save long pasin yumi mas bihainim. Baibel i tok: “Ol pasin yupela i laik bai ol man i mekim long yupela, yupela i mas mekim wankain pasin long ol.” (Luk 6:31) Yu inap bihainim dispela stiatok taim  yu ritim na salim teks mesis. Olsem wanem yu inap mekim olsem?

Salim teks mesis long taim i stret. Wanpela yangpela man, Richard, i tok: “Sampela taim mi kisim teks mesis long fon long biknait. Sampela mesis i no bikpela samting, na i save distebim mi long slip!” Askim yu yet, ‘Mi save salim teks mesis long ol pren bilong mi taim ol i malolo?’—Stiatok bilong Baibel: Saveman 3:1.

Raitim ol gutpela tok taim yu salim teks mesis. Taim yu toktok long wanpela, ol inap harim krai bilong nek, lukim pes, na pasin bilong yu long wokim han. Tasol taim yu salim teks mesis, ol i no inap luksave long ol dispela samting. So yu inap mekim wanem? Wanpela yangpela meri, Jasmine, i tok: “Yu inap raitim ol kain tok olsem, ‘Halo,’ ‘Plis’ na ‘Tenkyu.’”—Stiatok bilong Baibel: Kolosi 4:6.

Bihainim savetingting. Skelim gen askim i stap aninit long het tok “Hatwok Bilong En.” Sapos yu wet long kisim wanpela teks mesis, i gutpela long toksave long pren bilong yu. Tasol planti taim, yu inap ritim teks mesis bihain long yu toktok wantaim pren bilong yu. Amy i gat 17 krismas i tok: “Yu ken ritim teks mesis taim pren bilong yu i pinis long toktok long yu, bikos fon bilong yu bai stap, tasol pren bilong yu nogat.” Na tu, yu inap bihainim savetingting taim yu bung wantaim ol narapela. Jane i gat 18 krismas i tok: “No ken lusim bikpela haptaim long ritim na salim ol teks mesis. Sapos yu mekim olsem, i kain olsem yu tok, ‘Mi no laik stap long dispela bung.’”

Skelim gut teks mesis paslain long yu salim. Yu ting pren bilong yu bai kliagut long teks mesis yu salim? Yu ken salim ol liklik piksa na dispela bai helpim em long kliagut long mining bilong teks mesis. Amber i gat 21 krismas i tok: “Sapos yu salim teks mesis i pani, i gutpela long putim piksa bilong soim olsem yu tok pilai. Em bikpela samting long mekim olsem bikos taim man i no kliagut long mesis yu salim, dispela inap bagarapim bel bilong em.”—Stiatok bilong Baibel: Sindaun 12:18.

Em i bikpela samting long bihainim gutpela pasin taim yu yusim mobail fon!

Tingim: Pasin laikim i as bilong ol gutpela pasin. Olsem wanem yu inap soim pasin laikim? Baibel i tok: “Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em.” (1 Korin 13:4, 5) Yu mas wok strong long kisim wanem pasin na bai yu inap soim pasin laikim?