OL KANTRI NA OL MANMERI
Visitim Aialan
AIALAN i gat tupela kantri, bikpela kantri em Ripablik Bilong Aialan, na liklik kantri em Noten Aialan. Yunaitet Kingdom i bosim Noten Aialan.
Ol i kolim Aialan olsem Emerald Isle bikos planti taim ren i save pundaun na mekim ol gras na diwai samting i kamap planti na ples i luk nais tru. I gat ol naispela raunwara na ol wara, na tu, ol maunten i mekim ples i luk nais tru.
Ol man bilong Aialan i bin karim planti hevi. Olsem, sampela man i ting long 1845 i go 1851, klostu 1 milion manmeri i sik na dai bikos ol i sot long kaikai taim wanpela binatang i bagarapim ol poteto. Ol man i stap rabis tru, olsem na planti i go sindaun long ol narapela kantri olsem Australia, Inglan, Kanada, na Amerika. Long nau, inap olsem 35 milion manmeri long Amerika i tok lain tumbuna bilong ol i bilong Aialan.
Ol man bilong Aialan i gat pasin bilong tingim ol arapela, na tu, ol i gat pasin bilong helpim ol man. Ol i save amamas long raun long hos, na pilai ol spot olsem kriket, ragbi, soka, na Gaelic football, em wanpela spot i wankain long soka. Ol meri i save amamas long pilaim camogie, em wanpela spot i wankain long hoki.
Na tu, ol i save laikim musik na ol i lain bilong amamas long toktok long ol narapela. Long olgeta hap bilong graun ol man i save long Irish step dance, em danis bilong ol Aialan. Long dispela danis, ol man i sanap stret na muvim lek tasol long wanpela kain stail.
Ol Witnes Bilong Jehova i stap long Aialan winim wan handret yia samting. Long nau, winim 6,000 Witnes i stap long Aialan na ol i givim bel long skulim ol man long tok bilong Baibel.
YU SAVE LONG DISPELA?
I gat planti tausen pos ston basal long Giant’s Causeway, em ples i stap long nambis long hap not bilong Noten Aialan. Ol pos ston basal i kamap taim lava long volkeno i go long solwara na kamap kol.