Wanpela Lain (Save the Children International) i tok: “Long olgeta yia, klostu 3 milion bebi i save dai insait long wanpela mun long de mama i karim ol. Planti bilong ol i dai long ol sik samting we i no hatwok long oraitim. Winim 30 pesen bilong ol dispela bebi i save dai long de ol i bon.”

Lain Public Health England i tok, long 2011, insait long 15 distrik long London, namba bilong ol man i dai i go antap bikos ol i pulim win nogut. Ol man i tok disel i gutpela fiul, long wanem, em i no inap bagarapim ol diwai na gras samting, na tu, em i save kamapim liklik kabon daioksait. Tasol 91 pesen bilong win nogut long dispela hap i kam long ol kar i save yusim disel.

Long 2013, lain Public Opinion Foundation bilong Rasia i painimaut olsem klostu 52 pesen bilong ol man long Rasia husat i tok ol i bilong lotu Otodoks i no bin ritim wanpela hap bilong Baibel. Na 28 pesen bilong ol i save beten wan wan taim tasol.

Wanpela ripot bilong lain World Bank i soim olsem ol man i no save husat tru em ol papagraun. Dispela i pasim wok bilong agrikalsa, na planti man i stap rabis. Fifti pesen bilong graun olgeta em ol man i no yusim long wokim gaden samting i stap long Afrika. Ol man i yusim 25 pesen tasol bilong graun long Afrika long mekim wok agrikalsa.

Planti skul na ol yunivesiti i yusim ol kompiuta olsem ol teblet we i gat ol vidio na ol buk samting long en. Olsem na ol tisa i no yusim moa ol teks buk long skulim ol sumatin. Ol skul i seivim mani long baim ol teks buk, tasol ol man i gat tupela tingting olsem dispela nupela rot bai helpim ol sumatin o nogat.