“Daniel [profet bilong God i] . . . lukim samting olsem driman long nait. Na [em i] raitim stori bilong dispela driman long wanpela buk.”—Daniel 7:1.

BAIBEL I TOK

God i bin givim ol bikpela tok long ol man long kain kain rot. Long taim bilong ol man bilong raitim Baibel, sampela taim God i toktok long ol man long rot bilong ol driman. Tasol dispela i no olsem ol driman nating we i no gat as bilong en. Ol driman i kam long God i klia tru na i gat ol bikpela tok bilong en. Olsem, long wanpela driman, profet Daniel i lukim sampela wel animal i makim ol bikpela gavman bilong graun, kirap long taim bilong gavman bilong Babilon i kam inap long taim bilong yumi. (Daniel 7:1-3, 17) Na long rot bilong wanpela driman, God i tokim Josep bilong Nasaret, em waspapa bilong Jisas, long ranawe i go long Isip wantaim meri na pikinini bilong em. Olsem na Jisas i abrusim dai long han bilong man nogut, em King Herot. Taim Herot i dai, long rot bilong driman God i tokim Josep long kisim meri na pikinini bilong em na go bek long asples bilong ol.—Matyu 2:13-15, 19-23.

“No ken kalapim ol tok i stap long Rait Holi.” —1 Korin 4:6.

BAIBEL I TOK

God em i as bilong olgeta tok i stap long Baibel na dispela i makim tu olgeta driman em Baibel i stori long en. Long 2 Timoti 3:16, 17, Baibel i tok: “God em i as bilong olgeta tok i stap long Rait Holi, na ol i gutpela long skulim man, stretim man, mekim ol samting i kamap stret, na skulim ol man long stretpela pasin. Olsem bai wokman bilong God i ken i stap inap tru na redi long mekim olgeta kain gutpela wok.”

Baibel i helpim yumi long “redi,” olsem em i kamapim klia olgeta samting yumi mas save long God, ol pasin na ol stretpela lo bilong em, na olsem wanem yumi ol man i insait long samting God i tingting pinis long mekim long dispela graun. Olsem na God i no mekim wok moa long ol driman bilong givim ol tok long ol man. Sapos yumi laik kisim save long laik bilong God na ol samting bai kamap bihain, yumi no gat wok long “kalapim ol tok i stap long Rait Holi,” em ol tok bilong Baibel. Klostu olgeta man inap kisim dispela buk na ol inap kisim save long planti tok bilong en em God i kamapim long ples klia, na tu, ol inap kisim save long ol driman em Baibel i stori long en.

“Holi spirit i kirapim ol [man] long autim ol tok God yet i bin givim long ol.”—2 Pita 1:21.

BAIBEL I TOK

Planti driman i stap long Baibel i gat ol tok profet long en, olsem ol i tokaut long ol samting bai kamap bihain. Ol man bilong raitim Baibel i raitim ol dispela tok profet, na long dispela rot ol man inap skelim olsem tok ol man i bin raitim long Baibel i tru o nogat. Ol driman long Baibel i gat tok profet long en i bin kamap tru? Yumi ken tingim wanpela driman i stap long Baibel long Daniel 8:1-7. Ol i bin raitim tok bilong dispela driman klostu long taim gavman bilong Babilon i bagarap.

Dispela tok profet long Baibel i tok piksa long wanpela sipsip man na wanpela meme man. Dispela meme man i pait long sipsip man na i daunim na krungutim em long lek bilong en. Maski Daniel i lukim dispela driman, i no gat wok long em i mas painimaut mining bilong en. Wanpela ensel bilong God i tokaut olsem: “Sipsip man i gat tupela kom . . . i makim kantri Midia na kantri Persia. Na dispela meme yu bin lukim, em i makim kantri Grik.” (Daniel 8:20, 21) Ol samting i kamap bipo i soim olsem gavman bilong Midia na Persia i bin daunim Babilon na kamap nambawan gavman bilong graun. Klostu 200 yia samting bihain, Bikpela King Aleksander bilong kantri Grik i daunim gavman bilong Midia na Persia na kisim ol ples ol i bin bosim. Dispela i kamapim klia olsem olgeta tok profet bilong Baibel na ol driman i gat ol tok profet long en, olgeta i save kamap tru. I klia tru olsem Baibel i narakain tru long ol narapela buk holi, olsem na yumi inap bilip tru long olgeta tok bilong en.