FRANK na Jerry i bungim wankain hevi em planti man i gat. Taim i gat hevi namel long tupela man, planti taim ol i save belhat na sutim tok long narapela narapela. Na sapos ol i no stretim dispela hevi kwiktaim, ol inap lusim pasin pren bilong ol.

Ating wankain samting i bin painim yu, na dispela i mekim yu bel hevi! Tru tumas, yumi olgeta i laik stap wanbel wantaim ol pren na ol neiba bilong yumi. Tasol olsem wanem yumi inap stap wanbel wantaim ol taim hevi i kamap? Yu ting em i isi long lusim pasin bilong tingting kranki long narapela na fogivim em taim em i rongim yumi? Yumi inap bihainim gutpela pasin long stretim hevi?

Tingim hevi i kamap namel long Frank na Jerry. Tupela i mekim sampela samting na dispela i bagarapim pasin pren bilong ol. Olsem: (1) Jerry i no tingim filings bilong Frank, (2) Frank i no kamapim tingting bilong em long gutpela pasin, olsem na Jerry i bel hevi long dispela, (3) tupela wantaim i belhat, na (4) tupela i no mekim pasin daun.

Tasol bihain tupela i kisim stretpela tingting. Ol i fogivim narapela narapela na ol i stap wanbel gen wantaim. Wanem samting i helpim ol long mekim olsem? Ol i bihainim sampela gutpela stiatok we i helpim planti man long stap olsem ol gutpela pren maski hevi i kamap.

Ol dispela stiatok i stap long wanpela buk em klostu olgeta man long graun inap kisim, em Baibel. Dispela buk i helpim yumi long daunim bel hevi yumi gat long  ol narapela na kisim ol pasin we i save kamapim pasin wanbel. Em ol kain pasin olsem gutpela tingting, gutpela pasin, pasin laikim, na pasin bilong i no belhat kwik.—Sindaun 14:29; 1 Korin 13:4, 5.

Stori bilong Frank na Jerry i kamapim klia olsem tok bilong Baibel i gat strong long senisim i stap bilong ol man. I gat planti eksampel olsem, na tu, i gat ol stori bilong ol man husat i senisim ol pasin kranki bilong ol. Olsem, Robert i stap long Australia i daunim pasin bilong em long belhat. Na Nelson long Is Timor i daunim pasin bilong bel nogut na em i kamap gutpela pren bilong wanpela man husat i bin birua long em. Olsem wanem Baibel i helpim Robert na Nelson? Nius Kirap! i mekim intaviu wantaim ol.

ROBERT, stori long bekgraun bilong yu.

Mi go bikpela insait long wanpela famili i gat planti hevi. Papa bilong mi i gat pasin bilong belhat na planti taim em i save paitim mi. Sampela taim em i save paitim mi i go inap long mi lusim blut na mi hap i dai. Em as na mi kamap man bilong belhat na pait. Taim mi tineja, ol i putim mi long skul bilong stretim ol bikhetmanki. Mi stap long dispela skul inap 2-pela yia. Bihain, mi mekim wanpela bikpela rong, olsem na ol i putim mi long strongpela haus kalabus. Taim mi lusim kalabus, mi go stap long Australia, na mi pasim tok long bel olsem mi mas senisim pasin bilong mi.

Wanem samting i helpim yu long mekim olsem?

Ol Witnes Bilong Jehova i stadi long Baibel wantaim mi na dispela i helpim mi long senisim pasin bilong mi. I bin gat sampela taim we i hatwok long bosim pasin bilong mi long belhat, dispela i bin mekim na planti taim mi pilim olsem mi no gutpela man tumas. Tasol mi tingim tok bilong Sindaun 19:11, em i tok: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Mi laik kisim kain gutpela tingting. Olsem na mi skelim tingting bilong mi, pasin bilong mi long toktok, na ol samting mi save mekim. Isi isi mi kisim pasin bilong i no les kwik, mi stap isi na mi redi long fogivim ol narapela.

Yu inap stori long wanpela eksampel?

Wanpela taim mi mekim pren bilong mi i belhat, olsem na em i krosim mi long ai bilong ol arapela. Dispela i mekim na mi sem tru! Tasol mi tingim skultok bilong Baibel olsem, “no ken bekim pasin nogut long man i mekim pasin nogut.” (Rom 12:17) Taim mi lukim olsen pren bilong mi i stap isi na em i no kros moa, mi go toktok wantaim em na mi painimaut olsem em i gat hevi long famili bilong em. Mipela i stretim tok, na bihain em i givim mi wanpela naispela saket olsem presen. Mi tingting olsem sapos mi no lusim pasin bilong mi long belhat, ating long dispela taim hevi inap kamap.

Yu save mekim wanem taim hevi i kamap long famili?

Mi na meri bilong mi i gat wanpela pikinini man husat i  gat 20 krismas. Na sampela taim mipela i no save wanbel long ol samting. Tasol mi kisim planti gutpela skul long Baibel, na tu, mi kisim save olsem pasin bilong tok sori em i bikpela samting. Tru tumas, taim man i pilim tru hevi i kamap na em i tok sori, dispela inap pasim hevi long kamap bikpela na pasin wanbel inap stap.

NELSON, yu man bilong smail na yu gat gutpela pasin. Tasol pastaim, yu man bilong belhat. Yu inap stori long dispela?

Taim mi yangpela, mi bin joinim wanpela lain politik na mipela i birua long gavman. Na tu, mi belhat long narapela lain politik husat i laik bosim distrik bilong mipela. Bilong kamap hapman bilong pait, mi kirap lainim ol kain pait olsem karate na mi save paitim ol man husat i mekim mi belhat.

Wanem samting i kirapim yu long senisim pasin bilong yu?

Taim mi kisim save long Baibel na bihainim ol tok bilong en, dispela i helpim mi long senisim pasin bilong mi. Mi pilim tru 2-pela tok mi lainim long Baibel. Namba 1: “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12) Namba 2: “Yu mas laikim ol arapela man olsem yu laikim yu yet.” (Matyu 22:39) Mi lukim pasin bilong ol Witnes, em ol lain husat i skulim mi long Baibel, ol i save soim pasin laikim maski ol i bilong narapela narapela lain na skin. Dispela i strongim mi long bihainim pasin bilong ol, olsem na ol pren bilong mi long bipo i kirap nogut long lukim olsem pasin bilong mi i senis na nau ol i no pret moa long mi.

I gat wanpela taim we yu bin belhat tru?

Mi no mekim olsem taim mi stap long ol pablik ples. Tasol taim mi stap long haus, sampela taim i bin hatwok long daunim pasin bilong mi long belhat. Wanpela taim mi belhat tru na mi paitim meri bilong mi, em samting mi bel hevi tru long en. Long gutpela pasin em i fogivim mi na dispela i mekim na mi wok strong long bosim belhat bilong mi.

Yu stori olsem ol man i no pret moa long yu. Yu inap stori long wanpela eksampel olsem?

Wanpela taim mi bungim lida bilong lain politik em mi save birua long ol long bipo. Nem bilong em Augusto. Taim em i lukim mi em i pret. Tasol mi smail na tok gude long em, na mi tokim em olsem i gutpela long lusim tingting long ol samting mipela i mekim long bipo, na mi singautim em long kam long haus bilong mipela.  Em i kam long haus bilong mi na em i kirap nogut long lukim olsem mi senisim pasin bilong mi, olsem na em tu i kirap long stadi long Baibel. Nau mi na Augusto i stap olsem gutpela pren na ol wanbilip tu.

I gat narapela narapela as na ol man i kros na belhat, na i no olgeta man bai redi long kamap wanbel wantaim narapela. Tasol Baibel i kamapim wanpela skultok we inap helpim yumi, em i tok: “Yupela i mas mekim olgeta samting yupela inap mekim bilong i stap wanbel wantaim olgeta man.”—Rom 12:18.

Stori bilong ol man long dispela atikol i soim olsem savetingting bilong Baibel i save helpim ol man. Tru tumas, tok bilong Baibel i gat “bikpela strong” long daunim pasin nogut. (2 Korin 10:4) Long Baibel, Sindaun 3:17, 18 i tok: “Gutpela tingting bai i mekim yu belgut oltaim na mekim sindaun bilong yu i kamap gutpela. Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.”

Yu laik stap amamas na stap wanbel wantaim ol narapela? Yu laik stap pren bilong ol man husat i laik stap wanbel maski sampela taim hevi i kamap? Sapos olsem, yu inap stap amamas sapos yu larim tok bilong Baibel i stiaim yu.