PLANTI man i save long Whiston, na moa yet ol sumatin bilong Baibel, long wanem, em i bin tanim ol rait bilong Flavius Josephus i go long tok Inglis. Flavius Josephus em wanpela saveman bilong Juda husat i bin stap long taim bilong ol aposel. Buk The Works of Josephus i stori gut long histori bilong ol Juda na laip bilong ol Kristen long pastaim.

Whiston i gat bikpela save, olsem na em i kirap stadi long planti samting, moa yet long ol samting bilong lotu na saiens. Em i bilip olsem tok bilong Baibel long ol samting God i bin wokim i stret, na disain bilong ol samting i stap laip na hau ol i wok gut tru i kamapim klia olsem i gat Man i bin wokim olgeta samting.

Na tu, Whiston i bilip olsem ol lotu Kristendom i bruk na i kamapim planti lotu, long wanem, ol bikman bilong lotu i no kamapim ol astingting bilong Baibel, nogat. Ol i kamapim ol bilip em Ol Tisa Bilong Misin i as bilong en.

Whiston i luksave olsem Baibel i gat ol tok i tru bilong God, olsem na em i sakim dispela bilip olsem ol man i save kisim pen oltaim long helpaia. Em i ting kain bilip olsem i no gat as bilong en, na tu, dispela tingting i mekim na i kain olsem God em i man nogut tru. Whiston i sakim bilip bilong God Triwan, olsem na em i no stap wanbel wantaim ol bikman bilong lotu. Ol man i bilip long God Triwan i tok Papa, Pikinini, na Holi Spirit ol i wankain na ol i stap oltaim. Na tu, ol i tok dispela tripela god ol i wanpela, olsem na i gat wanpela god tasol i stap.

Whiston i mekim wok painimaut, na em i luksave olsem ol Kristen long pastaim i no skulim ol man long bilip bilong God Triwan, nogat. Ol i kisim dispela bilip long ol bilip haiden. a Ol pren bilong Whiston i tokim em olsem hevi bai painim em sapos em i raitim ol buk samting i stori long ol wok painimaut em i mekim. Tasol Whiston i no laik sapotim dispela bilip giaman olsem Jisas em i God, nogat, em i bilip olsem God i bin wokim Jisas, na em i Pikinini Bilong God.

University of Cambridge i save rausim ol man long wok sapos ol i skulim ol man long ol bilip we i agensim ol bilip bilong lotu Angliken, dispela i makim olsem Whiston inap lusim wok bilong em. Maski i olsem, Whiston i no larim wok bilong em na ol narapela samting long pasim em long kamapim tok i tru bilong Baibel. Em i no bihainim pasin bilong Newton, em i bin luksave olsem bilip bilong God Triwan em bilip giaman, tasol em i no tokaut long dispela samting.

Long yia 1710, ol i rausim Whiston long wok, so em i no stap moa olsem profesa long yunivesiti bilong Cambridge. Whiston i holim strong bilip bilong em, olsem na “em i lusim wok olsem wanpela profesa na i kamap man nating.” Maski ol i tok olsem em i kamapim ol bilip giaman we i agensim ol bilip bilong lotu, em i strongim bel na raitim buk Primitive Christianity Revived. Dispela tok “primitive” i makim lotu Kristen em ol disaipel bilong Jisas long pastaim tru i bihainim. Bihain Whiston i kamapim wanpela grup nem bilong en Society for Promoting Primitive Christianity. Na ol dispela lain i save bung long haus bilong em long London.

Whiston i lusim wok olsem wanpela profesa na dispela i givim hevi long em long sait bilong mani. Maski i olsem, em i wok yet long raitim ol buk na skulim ol man long ol restron samting long London. Long 1737, em i tanim ol rait bilong Josephus we i stori long ol samting i kamap long ol Kristen long pastaim tru. Kirap long dispela taim na i kam inap long nau, ol i prinim yet dispela buk.

Wanpela man bilong raitim buk em James E. Force i stori olsem planti man long nau i tingim Whiston, long wanem, em i strongim bel maski ol man i birua long em. Ol narapela i tingim em olsem saveman bilong Baibel, man bilong painim tok i tru bilong Baibel, na man bilong strong long bihainim bilip bilong em.◼