Sampela polis i yusim ol nupela masin long helpim ol long painim kwik ol kar. Olsem, i gat wanpela liklik masin i luk olsem gan i stap long fran bilong sampela polis kar. Ol polis i yusim dispela masin i luk olsem gan long tromoi ol liklik GPS masin i go pas long ol narapela kar. Na dispela i helpim ol long luksave long kar em ol raskol i stilim na ol i ken painim kwik.

Ol man i ting long olgeta wan wan aua, ol man i save kilim i dai wanpela meri, long wanem, ol i kros pait long mani em famili bilong meri i givim long famili bilong man. Gavman i orait long dispela pasin bilong kisim na givim mani. Tasol long 2012 ol i kilim i dai winim 8,200 meri, bikos man bilong ol o famili bilong man i ting olsem mani em famili bilong meri i givim i no inap long mak ol i laikim.

Ol man i pasim ol teg long lek bilong 3-pela pisin alpine swifts long bihainim ron bilong ol, na ol i painimaut olsem ol dispela pisin i flai winim 200 de bilong i go long Afrika na ol i no malolo liklik. Bipo ol man i bin mekim sampela wok painimaut long ol animal bilong solwara, na ol i ting ol dispela animal tasol inap mekim kain samting olsem.

Kirap long Epril 2005 i go inap long Disemba 2012, lain raskol bilong solwara i stilim 179 sip long kos bilong Poin Bilong Afrika. Lain World Bank i tok, gavman i givim klostu 413 milion dola bilong Amerika long ol dispela lain raskol bilong baim bek ol wokman long sip.