Wok Bilong Blakbokis Long Bikbus
OL MAN bilong wokim gaden i save olsem bilong kaikai i ken gro gut, ol i mas planim ol sid long graun i gat gris na long taim stret. Tasol em narakain samting long save olsem i gat wanpela blakbokis i save flai raun long bikbus long nait na tromoi ol sid long graun. Nem bilong dispela blakbokis em Old World Fruit Bats. a
Tromoi Ol Sid Long Olgeta Hap
Ol dispela blakbokis i save flai long nait bilong painim ol diwai i gat ol naispela prut na ol plaua i gat switpela wara. Taim ol i kaikai ol prut ol i save trautim ol sid bilong en. Narapela wok ol i mekim em ol i save karim paura bilong wanpela plaua i go long narapela plaua.
Ol blakbokis bilong kaikai prut i save flai long olgeta hap long nait, olsem na ol inap tromoi ol sid long planti hap. Na taim ol i pekpek dispela i givim gris long graun na i helpim ol sid long gro. Na tu, ol blakbokis i save karim paura long wanpela diwai i go long narapela na dispela i helpim ol diwai na gras samting long kamap planti.
Ol dispela blakbokis i save flai longwe
tru i go long planti hap, olsem na yumi ken ting olsem ol inap lukluk gut na ol i gat bikpela save long stiaim raun bilong ol. Taim ples i tudak yumi ol man i no inap lukim gut ol samting, tasol ol blakbokis inap lukim klia ol samting. Ol inap luksave tu long ol narapela narapela kala. Na tu, ol inap flai long san na long nait.Famili Laip Bilong Ol Blakbokis
YU SAVE LONG DISPELA? Ol blakbokis bilong kaikai prut i narapela kain long ol narapela blakbokis. Ol narapela blakbokis i save singaut bilong painim kaikai, tasol ol blakbokis bilong kaikai prut i save lukim na smelim ol samting bilong painim kaikai. Na tu, ai bilong ol i traipela na dispela i helpim ol long lukim klia ol samting long nait
Ol blakbokis bilong Samoa (Pteropus samoensis) i save lukautim gut narapela narapela. Wanpela wok painimaut long wanpela lain blakbokis i soim olsem ol meri blakbokis i save lukautim gut ol pikinini bilong ol. Ol bai lukautim pikinini bilong ol inap sampela wik na givim susu long en i go inap long taim em i go bikpela. Na tu, ol man i bin skelim tupela narapela lain blakbokis, na ol i painimaut olsem ol meri blakbokis i save helpim narapela narapela long taim ol i laik karim pikinini.
Tasol sori tru, planti blakbokis i no stap moa, wanpela risen em ol man i wok long bagarapim ol bikbus. Dispela inap kamapim ol bikpela hevi long sampela ailan bilong Pasifik, long wanem, ol blakbokis i save helpim ol diwai na gras samting long karim kaikai. I klia tru olsem wok ol blakbokis i save mekim long bikbus i bikpela samting.
a Old World Fruit Bats i stap long Afrika, Australia, Esia, na long sampela ailan bilong Pasifik.